بۆ پاراستنی رێڕه‌وی لێكۆڵینه‌وه‌ یاساییه‌كان رووماڵی تاوان قه‌ده‌غه‌ ده‌كرێت

میدیاکان

لێکۆڵینەوە لە تاوان

حکومەتى هەرێمى کوردستان لە راگەیەنراوێکدا رایگەیاند: به‌پێی گشتاندنێكی سه‌رۆكایه‌تیی دیوانی ئه‌نجومه‌نی وه‌زیران، كه‌ ئاڕاسته‌ی گشت وه‌زاره‌ت و داموده‌زگاكانی حكومه‌ت كراوه‌، بۆ پاراستنی رێره‌وی لیكۆڵینه‌وه‌ یاساییه‌كان رووماڵی تاوان قه‌ده‌غه‌ ده‌كرێت.

ئاماژەبەوەدراوە: به‌پێی گشتاندنێكی سه‌رۆكایه‌تیی دیوانی ئه‌نجومه‌نی وه‌زیران، كه‌ ئاڕاسته‌ی گشت وه‌زاره‌ت و داموده‌زگاكانی حكومه‌ت كراوه‌، له‌مه‌ودوا ر‌ێگه‌ به‌ هیچ كه‌ناڵ و په‌ڕ‌ه‌ی تۆڕ‌ی كۆمه‌ڵایه‌تی نادرێت، دیمه‌ن و ڤیدیۆی ر‌ووداوی تاوان و تۆمه‌تباران و شوێن و كاتی تاوانه‌كان بڵاو بكه‌نه‌وه‌ و ر‌ووماڵی بكه‌ن.

هەر لە راگەیەنراوەکەشدا ئەوە هاتووە:ئه‌م گشتاندنه‌ له‌سه‌ر بنه‌مای داواكارییه‌كی ده‌سته‌ی سه‌ربه‌خۆی مافی مرۆڤ بۆ ئه‌نجومه‌نی وه‌زیران كراوه‌، كه‌ تێیدا داوای كردووه‌، بۆ پاراستنی ر‌ێڕ‌ه‌وی لێكۆڵینه‌وه‌ و لایه‌نی ده‌روونی و كۆمه‌ڵایه‌تیی ژیانی خه‌ڵك و نه‌قۆستنه‌وه‌ی رووداوه‌كان بۆ دووبه‌ره‌كیی سیاسی و كۆمه‌ڵایه‌تی، ر‌ێگه‌نه‌درێت ر‌ووماڵی ر‌استه‌وخۆ و ناڕ‌استه‌وخۆی تاوان و تۆمه‌تباران بكرێت، ئه‌مه‌ش له‌پێناو سه‌لامه‌تیی گشتیی و ئاسایشی تاك و كۆمه‌ڵگه‌، رێزگرتن له‌ رێره‌وی لێكۆڵینه‌وه‌ یاساییه‌كان و بنه‌ماكانی مافی مرۆڤ.

ئەمەش لە کاتێکدایە لە ماوەى 9 مانگى رابردوو بۆردى راگەیاندنى یەکێتیى نیشتمانیى کوردستان بە هیچ شێوەیەک رووماڵى راستەوخۆى تاوانەکانى نەکردووە و وەک ئیتیکى کارى رۆژنامەوانى پابەندى پرنسیپە رۆژنامەوانییەکان بووە.

PUKMEDIA