رێككه‌وتنه‌كانی هه‌ولێر و به‌غدا نه‌چوونه‌ته‌ بواری جێبەجێکردنەوە

PUKMEDIA

لۆگۆی حکومەتی هەرێم و حکومەتی فیدراڵ

هه‌رچه‌نده‌ بڕیاربوو له‌چه‌ند رۆژی داهاتوودا، هه‌نارده‌ی نه‌وتی هه‌رێمی كوردستان ده‌ستپێبكاته‌وه‌و هه‌رێم نه‌وت راده‌ستی كۆمپانیای سۆمۆ بكات، به‌ڵام ئه‌و ده‌نگۆیه‌ ره‌تده‌كرێته‌وه‌، هاوكات تائێستاش ئه‌نجومه‌نی ده‌وڵه‌ت راپۆرتی خۆی له‌سه‌ر داهاته‌ نانه‌وتییه‌كان نه‌ناردووە بۆ ئه‌نجومه‌نی وه‌زیران و به‌مه‌ش رێككه‌وتنه‌كانی هه‌ولێر و به‌غدا نه‌چوونه‌ته‌ بواری پراكتیكییه‌وه‌.


سه‌رچاوه‌یه‌كی باڵا له‌به‌غدا تایبه‌ت به‌ PUKMEDIA ی راگه‌یاند:سه‌رجه‌م ئه‌و هه‌واڵانه‌ی باس له‌هه‌نارده‌كردنه‌وه‌ی نه‌وت له‌ڕ‌ێگه‌ی كۆمپانیای سۆمۆوه‌ ده‌كه‌ن دوورن له‌ڕ‌استییه‌وه‌و هه‌ولێرو به‌غدا چه‌ندینجار رێككه‌وتوون، به‌ڵام به‌پراكتیكی ئه‌و رێككه‌وتنانه‌ نه‌چوونه‌ته‌ بواری جێبه‌جێكردنه‌وه‌.

سه‌رچاوه‌كه‌ وتیشی: هه‌ردوو حكومه‌ت به‌رپرسن له‌برسیكردنی خه‌ڵكی هه‌رێمی كوردستان، چونكه‌ كۆبوونه‌وه‌و ئه‌نجامی لیژنه‌كان هیچ ئەنجامێکی نەبووە و ته‌نها كات كوشتن بووه‌.

به‌پێی زانیارییه‌كانی PUKMEDIA كۆبوونه‌وه‌ی ئه‌مڕ‌ۆی ئه‌نجومه‌نی وه‌زیرانی عیراق هیچ باسێكی مووچه‌ی تێدا نییه‌، چونكه‌ كاره‌كانی لیژنه‌ی ئه‌نجومه‌نی ده‌وڵه‌ت ته‌واو نه‌بووه‌ تا راپۆرتی خۆی له‌سه‌ر پرسی داهاته‌ نانه‌وتییه‌كانی هه‌رێم بداته‌ ئه‌نجومه‌نی وه‌زیران.

هه‌رچه‌نده‌ ده‌نگۆی ئه‌وه‌ هه‌یه‌ كه‌ حكومه‌تی هه‌رێم به‌ كۆمپانیا نه‌وتییه‌كانی راگه‌یاندووه‌، كه‌ بڕ‌ی ئێستای نه‌وتی به‌رهه‌مهێنراو راده‌ستی كۆمپانیای سۆمۆ بكه‌ن، به‌ گلدانه‌وه‌ی 50 هه‌زار به‌رمیل نه‌وت بۆ پێداویستی ناوخۆی هه‌رێم، به‌و مه‌رجه‌ی حكومه‌تی عیراق گرفت بۆ داهاتی نانه‌وتی دروستنه‌كات و راسته‌وخۆ له‌مووچه‌ی مانگی حه‌وته‌وه‌، ته‌مویلی مووچه‌خۆرانی هه‌رێمی كوردستان بكرێت، به‌ڵام تائێستا له‌واقعدا ئه‌و هه‌ڵوێسته‌ له‌هه‌رێم نه‌بینراوه‌.

لەبەرامبەریشدا کۆمپانیای بەبازاڕکردنی نەوتی عیراق (سۆمۆ) راگەیانراوێکی بڵاوکردەوە و ئاماژەی بەوەکرد،"سەرجەم گرێبەست و پابەندبوونەکانمان لەگەڵ ئەو کۆمپانیایانە تەواوکردووە، کە نەوتی بەرهەمهێنراو لەهەرێم دەکڕن.

PUKMEDIA