سه‌رۆكی رێكخراوی په‌یامنێران: زۆرترین پێشێلكاری به‌رامبه‌ر به‌رۆژنامه‌نوسان له‌هه‌ولێر بووه‌

PUKMEDIA

هۆزان قادر سه‌رۆكی رێكخراوی په‌یامنێران

له‌ماوه‌ی هه‌شت مانگی رابردوودا ل هه‌رێمی كوردستان 31 پێشێلكاری به‌رامبه‌ر به‌ رۆژنامه‌نووسان ئه‌نجامدراوه‌، كه‌ زۆرترینیان له‌ پارێزگای هه‌ولێر بووه‌.

هۆزان قادر سه‌رۆكی رێكخراوی په‌یامنێران به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: له‌ماوه‌ی هه‌شت مانگی رابردووی ئه‌مساڵدا، 14 پێشێلكاری به‌رامبه‌ر به‌ ده‌زگا میدیاییه‌كان تۆماركراوه‌ و 31 پێشێلكاریش به‌رامبه‌ر به‌ رۆژنامه‌نووسان ئه‌نجامدراوه‌، هاوكات نۆ رۆژنامه‌نووس به‌هۆی گازی فرمێسك رێژه‌وه‌ له‌كاتی روماڵكردن ره‌وشی ته‌ندروستییان تێكچووه‌ و ره‌وانه‌ی نه‌خۆشخانه‌ كراون، هه‌روه‌ها چوار ده‌زگای میدیایی له‌كاتی روماڵكردنی خۆپیشاندانه‌كان له‌دێگه‌ڵه‌ رێگه‌یان پێنه‌دراوه‌ بگه‌ڕ‌ێنه‌وه‌ هه‌ولێر، دوای په‌یوه‌ندیكردن به‌ لایه‌نه‌ په‌یوه‌ندیداره‌كان دوای یه‌ك رۆژ ئینجا رێگه‌یان پێدراوه‌ بگه‌ڕ‌ێنه‌وه‌ شاره‌كه‌.

راشیگه‌یاند: له‌مساڵدا 15 حاڵه‌تی رێگه‌نه‌دان به‌ روماڵكردن تۆماركراوه‌ و 11 رۆژنامه‌نووسیش گیراون و به‌ كه‌فاله‌ت ئازادكراون، زۆرترین پێشێلكاریش له‌ شاری هه‌ولێر بووه‌ و كه‌مترین پێشێلكاری له‌ هه‌ڵه‌بجه‌ تۆماركراوه‌.

هۆزان قادر ئاشكراشیكرد: زۆرترین پێشێلكاری له‌لایه‌ن فه‌رمانگه‌ی میدیا و زانیاری حكومه‌تی هه‌رێمه‌وه‌ ئه‌نجامده‌درێت، كه‌ جیاوازی له‌نێوان میدیاكان ده‌كات و ئه‌و میدیانه‌ی كه‌ له‌خۆیانه‌وه‌ نزیكه‌ زانیارییان پێده‌دات و میدیاكانی دیكه‌ پشتگوێ ده‌خات.

PUKMEDIA