داوا لەدەزگاکانی راگەیاندن دەکرێت خۆیان لەڕووماڵکردنی هەواڵی ئاسایشی ئەلیکترۆنی بەدووربگرن

FREEPIK

هێرشی ئەلیکترۆنی

سەنتەری نیشتمانی ئاسایشی ئەلیکترۆنیی پارێزگای کەرکوک داوا لەدەزگاکانی راگەیاندن دەکات وردبین‌و بەرپرسیاربن لەڕووماڵکردنی هەواڵی ئاسایشی ئەلیکترۆنیدا و بەتەنها پشت بەلێدوانە رەسمییەکان ببەستن.

لەڕاگەیەنراوێکدا بۆ ڕای گشتی، سەبارەت بە رووداوی بردنی داتاکانی پارێزگاکە، سەنتەری نیشتمانی ئاسایشی ئەلیکترۆنیی پارێزگای کەرکوک رایگەیاند: هێرشی گروپە نایاساییەکان، زیانێکی ئەوتۆیان بەسیستمی سەرەکی ئۆپەراسیۆنی وەزارەتەکان یان دامەزراوە حکومییەکان نەگەیاندووە".

راشیگەیاندووە: سەنتەری نیشتمانی ئاسایشی ئەلیکترۆنی، بەهەماهەنگی لەگەڵ پارێزگای کەرکوک ‌و دەزگا پەیوەندیدارەکانی حکومەت، توانییان هەوڵەکانی هاککردن پوچەڵبکه‌نه‌وه‌و کاریگەرییەکانیان بەتەواوی ڕابگرن، هاوکات دزەپێکردنی داتا راپۆرتکراوەکان تەنها داتا کۆنەکان بوون‌ و هیچ بەهایەکی کارکردنیان نەبوو، هەماهەنگیش بەردەوامە بۆ گرتنەبەری هەموو رێوشوێنێکی ئەمنی ‌و یاسایی بەرامبەر لایەنە بەرپرسەکان.

هاوکات لە ڕاگه‌یه‌نراوه‌كه‌دا داواش لەسەرجەم دەزگاکانی راگەیاندن کراوە، وردبین‌و بەرپرسیاربن لەڕووماڵکردنی هەواڵی ئاسایشی ئەلیکترۆنیدا و بەتەنها پشت بەلێدوانە رەسمییەکان ببەستن.

PUKMEDIA