باڵیۆزانی نوێی عیراق لە بەردەم سەرۆككۆماردا سوێندی یاسایی دەخۆن

راگەیاندنی سەرۆككۆماری عیراق

باڵیۆزانی نوێی عیراق لە بەردەم سەرۆككۆماردا سوێندی یاسایی دەخۆن

ئەمڕۆ چوارشەممە 10ی 9ی 2025 لە كۆشكی بەغدا، بە ئامادەبوونی فوئاد حسێن، جێگری سەرۆكوەزیران و وەزیری دەرەوە، باڵیۆزانی نوێی عیراق، لە مەراسیمێكدا لە بەردەم د. لەتیف جەمال رەشید سەرۆككۆماری عیراق سوێندی یاساییان خوارد.

سەرۆككۆمار پیرۆزبایی لە باڵیۆزان كرد بۆ بەدەستهێنانی دەنگی ئەنجومەنی نوێنەران و دەستنیشانكردنیان وەك باڵیۆزی عیراق، جەختیشیكردەوە كە ئەم نوێنەرایەتییە بەرپرسیارێتییەكی قورسە و متمانەیەكی گەورەیە لە هەڵگرتنی پەیامی بەرگریكردن لە بەرژەوەندییەكانی عیراق لە كۆڕ و كۆڕبەندە نێودەوڵەتییەكان. ئاماژەی بەوەشكرد، لیستی باڵیۆزەكان دوای وردبینیكردنی سەدان ناو هەڵبژێردران، هیوای خواست كە هەوڵەكانیان هاوتا بێت لەگەڵ پێگەی عیراق و رۆڵی سەرەكی لە ناوچەكەدا.

سەرۆككۆمار باسی لە دۆخی عیراق و پێشهاتە ئەرێنییەكانی وڵات كرد و ئاماژەی بەوەدا كە عیراق دۆخی ئاسایش و سەقامگیری بەخۆیەوە دەبینێت. جەختیكردەوە لە پێویستی گەیاندنی وێنەی عیراقی بۆ كۆڕبەندەكانی نێودەوڵەتی، كاركردن بۆ باشتركردن و پتەوكردنی پەیوەندییە نێودەوڵەتییەكانی عیراق لە هەموو بوارەكاندا، هەروەها هاندانی كۆمپانیا گەورەكانی وەبەرهێنان بۆ كاركردن لە عیراق. 

باڵیۆزان سوپاس و پێزانینی خۆیان بۆ ئەم متمانەیە دەربڕی و پابەندبوونیان دووپاتكردەوە بۆ هەڵگرتنی پەیامی دڵسۆزانەی نیشتمانی و كاركردن بۆ بەرزكردنەوەی وێنە و بەرژەوەندییەكانی عیراق لەسەر ئاستە جیاوازە نێودەوڵەتییەكان.

PUKMEDIA