له‌باره‌ی مووچه‌ی خانه‌نشینانه‌وه‌ دڵنیایی ده‌درێت

الهدی

بەشێک لە خانەنشینانی عیراق

ئه‌ندامێكی لیژنه‌ی دارایی په‌رله‌مانی عیراق دڵنیای له‌نه‌بوونی كێشه‌ له‌ مووچه‌ی خانه‌نشینان ده‌دات و رایده‌گه‌یه‌نێت، ته‌واوی ئه‌و ده‌نگۆیانه‌ی باس له‌ راگرتنی مووچه‌ی ئه‌و توێژه‌ ده‌كه‌ن دوورن له‌ڕاستییه‌وه‌.

ئه‌مڕ‌ۆ چوارشه‌ممه‌ 10ی ئه‌یلولی 2025 مه‌زه‌ر كه‌روی ئه‌ندامی لیژنه‌ی دارایی په‌رله‌مانی عیراق رایگه‌یاند: هیچ مه‌ترسییه‌ك له‌سه‌ر مووچه‌ی خانه‌نشینان عیراق نییه‌ و گه‌ره‌نتی ته‌واو هه‌یه‌ بۆ خه‌رجكردنی مووچه‌كانیان له‌داهاتوودا به‌بێ هیچ گرفتێک.

باسی له‌وه‌شكردووه‌، هۆکاری دواکەوتنی  دابه‌شكردنی مووچه‌ی خانه‌نشینان، ته‌نها كێشه‌ی هونه‌ری بووه‌ له‌نێوان وه‌زاره‌تی دارایی عیراق و وه‌زاره‌ته‌كانی دیكه‌دا و به‌زووترین كات ئه‌و كێشه‌یه‌ش چاره‌سه‌ر ده‌بێت و دواكه‌وتن له‌ دابه‌شكردنی مووچه‌ی خانه‌نشینان نامێنێت.

ئه‌مه‌ش دوای ئه‌وه‌دێت، له‌چه‌ند رۆژی رابردوودا به‌هۆی نه‌بوونی پاره‌ی نه‌ختینه‌ی پێویسته‌وه‌ لای وه‌زاره‌تی دارایی عیراق دابه‌شكردنی مووچه‌ی خانه‌نشینان چه‌ند رۆژێك دوواكه‌وت و ده‌نگۆی ئه‌وه‌ هه‌بوو له‌مانگه‌كانی داهاتووشدا به‌هۆی نه‌بوونی پاره‌ی كاش له‌لای وه‌زاره‌تی دارایی عیراق هه‌مان كێشه‌ دووباره‌ ببێته‌وه‌.

PUKMEDIA