حكومه‌تی هه‌رێم لیستێكی دیكه‌ی مووچه‌ بۆ به‌غدا ده‌نێرێت

PUKMEDIA

دراوی عیراقی

ئەمڕۆ 9 ی ئەیلوولی 2025 لیستی مووچەی مانگی ئابی فەرمانبەران و مووچەخۆرانی هەرێمی کوردستان لەلایەن تیمی تەکنیکی وەزارەتی دارایی و ئابووری هەرێمی کوردستانەوە ڕادەستی فەرمانگەی ژمێریاری وەزارەتی دارایی حکومەتی فیدراڵ کرا، لە کاتێکدا تائێستا مووچەخۆرانی هەرێمی کوردستان مووچەی مانگی حوزەیرانیان وەرگرتووە.                          

هەرێم 120 ملیار دینارى خستە سەر هەژماری وەزارەتی دارایی فیدراڵ.

رۆژی 28ى8ى2025 رێکارەکانى ناردنی داهاتی نانەوتی بۆ عیراق تەواوبوون و 120 ملیار دینارەکە خرایە سەر هەژماری وەزارەتی دارایی فیدراڵ.

هاوکات وەزارەتی دارایی و ئابووری حکومەتى هەرێم رایگەیاند: داهاتی نانەوتی هەرێمی کوردستان بۆ مانگی حوزەیرانی ساڵی (2025 ) کە بڕەکەی (12000000000 ) سەدو بیست ملیار دینارە، بەشێوەی کاش خرایە سەر هەژماری بانکی وەزارەتی دارایی حکومەتی فیدراڵ لەلقی هەولێری بانکی ناوەندی عیراق.

وەزارەتی دارایی فیدراڵ زیاتر لە یەک ترلیۆنی بۆ هەریم نارد

لەبەرامبەردا رۆژی 1ى9ى2025 وەزارەتی دارایی و ئابووری عیراق بڕی (1,007,352,000,000) یەک ترلیۆن و حەوت ملیارو سێ سەدو پەنجاو دوو ملیۆن دینار وەک تەمویلی مووچەی مانگی حوزەیرانی فەرمانبەران و مووچەخۆرانی هەرێمی کوردستانی خستە سەر هەژماری بانکی وەزارەتی دارایی و ئابووری هەرێمی کوردستان لەلقی هەولێری بانکی ناوەندی عیراق.

ئەمەش لە كاتێكدایە رۆژى 2ى9ى2025، لە مانگی 9 دا وەزارەتی دارایی ئابووری حکومەتی هەریمی کوردستان، بە سێ رۆژ مووچەی مانگی 6ی مووچەخۆرانی هەریمی کوردستانی دابەشکرد و تا ئێستاش چارەنووسی مووچەی مانگەکانی 7 و 8 دیارنین.

PUKMEDIA