تره‌مپ كۆتایی به‌جه‌نگی غه‌ززه‌ ده‌هێنێت

رۆیتەرز

دۆناڵد تره‌مپ سه‌رۆكی ئه‌مریكا

سه‌رۆكی ئه‌مریكا كۆتا پێشنیاری بۆ راگرتنی جه‌نگی غه‌ززه‌ خسته‌ڕ‌وو، هه‌ریه‌كه‌ له‌ ئیسرائیل و حه‌ماس-یش پێی رازیبوون و به‌مه‌ش كۆتایی به‌ جه‌نگی دوو ساڵه‌ ده‌هێندرێت.

دۆناڵد تره‌مپ سه‌رۆكی ئه‌مریكا رایگه‌یاند: كۆتا پێشنیاری خۆم بۆ كۆتاییهێنان به‌ شه‌ڕ‌ی غه‌ززه‌ خستووه‌ته‌ڕ‌وو، ئیسرائیلیش به‌ پێشنیاره‌كه‌م رازیبووه‌و پێویسته‌ حه‌ماسیش رازی بێت و به‌پێچه‌وانه‌شەوه‌ زه‌بری كوشنده‌ی به‌رده‌كه‌وێت و ئه‌مه‌ كۆتا ده‌رفه‌ته‌.

له‌به‌رامبه‌ردا بزووتنه‌وه‌ی حه‌ماس-یش له‌ راگه‌یه‌ندراوێكدا ئاماژه‌ی به‌وه‌كردووه‌: ئێمه‌ به‌پێشنیاره‌كه‌ی سه‌رۆكی ئه‌مریكا رازین و ئاماده‌ین سه‌رجه‌م بارمته‌ ئیسرائیلییه‌كان ئازاد بكه‌ین، به‌ڵام پێویسته‌ گره‌نتی ئه‌وه‌بدرێت كه‌ به‌یه‌كجاری كۆتایی به‌جه‌نگ بهێندرێت و ناتانیاهۆش سوپاكه‌ی له‌ته‌واوی كه‌رتی غه‌ززه‌ بكشێنێته‌وه‌.

ئه‌مه‌ش دوای ئه‌وه‌دێت له‌ 7ی تشرینی یه‌كه‌می ساڵی 2023 بزووتنه‌وه‌ی حه‌ماس ئۆپه‌راسیۆنی تۆفانی ئه‌قسای بۆ سه‌ر ئیسرائیل ده‌ستپێكرد و بووه‌ هۆی هه‌ڵگیرسانی جه‌نگێكی خوێناوی له‌نێوان هه‌ردوولا، هاوکات تا ئێستا زیاتر له‌ 64 هه‌زار و 455 كه‌س له‌غه‌ززه‌ كوژراون و نزیكه‌ی هه‌زار كه‌سیش له‌سوپای ئیسرائیل كوژراون و به‌هه‌زارانی دیكه‌ش برینداربوو.

PUKMEDIA