سیستمی دەرهێنانی كارتی نیشتمانی دەگۆڕێت

PUKMEDIA

کارتی نیشتمانی

وەزارەتی ناوخۆی عیراق لە سەرەتای ساڵی نوێ-وە سیستمێكی نوێ بۆ دەرهێنانی كارتی نیشتمانی دەخاتەكار، كە تێیدا دەتوانرێت منداڵ دەستبەجێ دوای لەدایكبوونی كارتی نیشتمانی بۆ دروستبكرێت.

ئەحمەد حەدید بەڕێوەبەری رەگەزنامە و زانیاریی شارستانیی عیراق رایگەیاند: لە سەرەتای ساڵی داهاتووەوە سیستمێكی نوێ بۆ دروستكردنی كارتی نیشتمانی كاریپێدەكرێت و تێیدا بەشی وردبینی ناوەندی كارا دەكرێت، كە توانای وردبینكردنی مامەڵەی سەرجەم فەرمانگەكانی كارتی نیشتمانی هەیە و ژمارەیان 328 فەرمانگەیە، لەگەڵ 21 بەشی تۆماركردنی ناوەندی و هەشت نووسینگە لە باڵیۆزخانەی عیراق.

ئەوەشی خستەڕوو، لە سیستمە نوێیەكەدا خزمەتگوزاری و ئاسانكاری زیاتر بۆ هاووڵاتییان دەستبەردەكرێت، هەروەها تێیدا دەتوانرێت لەدوای لەدایكبوونی  منداڵ دەستبەجێ  كارتی نیشتمانی بۆ دروستبكرێت، پێچەوانەی سیستمی ئێستا، كە ناتوانرێت كارتی نیشتمانی بۆ منداڵانی خوار 12 ساڵ دەربهێنرێت.

بەڕێوەبەری رەگەزنامە و زانیاریی شارستانیی عیراق راشیگەیاند: بەپێی دوایین ئامار، تاكو رۆژی 1ی ئەیلول 46 ملیۆن و 241 هەزار و 111 هاوڵاتی كارتی نیشتمانییان بۆ دروستكراوە.

PUKMEDIA