دیارییه‌كه‌ی سه‌رۆك مام جه‌لال بۆ كه‌ركوكییه‌كان سیمبولی پێكه‌وه‌ژیانه‌

PUKMEDIA

لۆگۆی دەزگای میدیایی کەرکوک

دەزگای میدیایی كەركوك یادی 14 ساڵەی دامەزراندنی دەكاتەوە و سەرپەرشتیار و بەڕێوەبەری كەناڵەكەش ئاماژە بەوەدەكەن، لە قۆناغی داهاتوودا لەسەر هەمان سیاسەتی میدیایی خزمەتی سەرجەم پێكهاتەكانی شاری كەركوك دەكەن و وەك كەناڵی پێكەوەژیان دەمێنێتەوە.

دەزگای میدیایی كەركوك 14 ساڵ پێش ئێستا وەك دیاری سەرۆك مام جەلال پێشكەشی شاری كەركوك كرا و تاكە كەناڵە كە بەزمانەكانی كوردی، عەرەبی، توركمانی، سریانی بەرنامە و هەواڵەكانی پێشكەش دەكات.

دیارییەكەی سەرۆك مام جەلال بۆ كەركوكییەكان

بەبۆنەی دامەزراندنی كەناڵەكەشەوە، رەوانشاد سەرۆك مام جەلال لەوكاتەدا وتارێكی پێشكەش كرد و رایگەیاند: "كەناڵی كەركوك دیارییەكی دیكەی یەكێتیی نیشتمانیی كوردستانە بۆ شارە خۆشەویستەكەی كەركوك و هەموو كەركوكییەكان، كردنەوەی كەناڵی ئاسمانی كەركوك هەنگاوێكی ترە بۆ پێشكەوتنی شارە خۆشەویستەكەی كەركوك لە بواری راگەیاندن و رۆشنبیری، هاوكات بۆ ئەوەشە كە ببێتە هۆكارێكی كاریگەر بۆ قوڵكردنەوەی گیانی پێكەوەژیان لە شارەكە، چونكە یەكێتی هەمیشە پێیوابووە كە ئایندەی كەركوك بەندە بە پێكەوەژیانی پێكهاتەكان لە شارەكە".

كەناڵی كەركوك خزمەتی سەرجەم پێكهاتەكان دەكات

عیماد ناسح سەرپەرشتیاری دەزگای میدیایی كەركوك، بە وێبسایتی رەسمی یەكێتیی نیشتمانیی كوردستان  PUKMEDIA ی راگەیاند: كەناڵی كەركوك لە قۆناغی داهاتوودا لەسەر هەمان سیاسەتی میدیایی خزمەتی سەرجەم پێكهاتەكانی شارەكە دەكات و وەك كەناڵی پێكەوەژیان دەمێنێتەوە، هەرچەندە لە سەرەتادا و لە ساڵی 2004 ەوە وەك كەناڵێكی لۆكاڵی لەسەر بڕیاری سەرۆك مام جەلال، بە زمانەكانی كوردی، عەرەبی، توركمانی و سریانی دەستیبەپەخش كرد، بەڵام توانی لە ماوەیەكی كەمدا ببێتە جێی خواستی كەركوكییەكان.

راشیگەیاند: كەناڵەكە كە لە ساڵی 2011 ەوە كراوە بە ئاسمانی، لەسەر هەمان رێبازی سەرۆك مام جەلال بەردەوامە، بۆ زیاتر گەیاندنی پەیامی یەكێتیش كە پێكەوەژیان و سیاسەتی چەپكە گوڵەكەیە.

كەناڵی ئاسمانی كەركوك سەكۆی ئاشتی و پێكەوەژیان  

سۆران داودی، بەڕێوەبەری كەناڵی ئاسمانی كەركوك، بە وێبسایتی رەسمی یەكێتیی نیشتمانیی كوردستان  PUKMEDIA ی راگەیاند: كەناڵەكە دەنگ و رەنگی هەموو نەتەوەكانی شاری كەركوك بەرجەستە دەكات و لەماوەی تەمەنی پر لەشكۆی میدیاییدا توانیویەتی خزمەتێكی زۆری بینەرانی بكات لە بوارە جیاجیاكاندا و هەردەم پێشەنگ بوەو لە جێبەجێكردنی سیاسەتی چەپكە گوڵەكەو گەیاندنی پەیامی ئاشتی و پێكەوەژیان.

وتیشی: دامەزراندنی كەناڵی ئاسمانی كەركوك ویستێكی بنەڕەتی كۆمەڵگای جۆراو جۆری كەركوكە كە نەتەوەكانی كورد و عەرەب و توركمان و كلد و ئاشوری لەخۆ دەگرێت و بەردەوامە لە ئەركی گەیاندنی پەیامی راستەقینەی پیشەی میدیاییدا. 


كه‌ناڵی كه‌ركوك له‌ماوه‌ی ئه‌م چوارده‌ ساڵی ته‌مه‌نیدا، توانیویه‌تی پیشه‌ییانه‌ و دڵسۆزانه‌ كاربكات و پابه‌ند بێت به‌ ئیتیكی ڕ‌ۆژنامه‌وانی و ده‌نگی راسته‌قینه‌ی كه‌ركوكییه‌كان بگه‌یه‌نێت و ببێته‌ میمبه‌رێك بۆ گشت پێكهاته‌كان.

PUKMEDIA