نزیکەی 5 ملیۆن کەس لەهەرێم فۆڕمی خۆراکی ئەلکترۆنییان پڕکردووەتەوە

راگەیاندنی بەڕێوەبەرایەتی خۆراک

فۆڕمى ئەلکترۆنى خۆراک

پرۆسەی نوێکردنەوە و بەئەلکترۆنیکردنی فۆڕمی خۆراک کۆتاییهات و به‌ڕ‌‌ێوه‌به‌ری پسوڵه‌ی خۆراكی سلێمانی-ش دەڵیت:" تا ئێستا 86٪ی هاووڵاتیان لەسەرجەم پارێزگاکانی هەرێم فۆڕمی خۆراکەکانیان کردووە بە ئەلکترۆنی کە دەکاتە 4 ملیۆن و 652 هەزار و 283 کەس".

ئاراس محه‌مه‌د به‌ڕ‌‌ێوه‌به‌ری پسوڵه‌ی خۆراكی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: تا ئێستا 86٪ی هاووڵاتیان لەسەرجەم پارێزگاکانی هەرێم فۆڕمی خۆراکەکانیان کردووە بە ئەلکترۆنی کە دەکاتە 4 ملیۆن و 652 هەزار و 283 کەس، لەژمارەیەش ملیۆنێک و 741 هەزار و 907 کەسیان لەپارێزگای هەولێرن کە دەکاتە 88٪ و ملیۆنێک و 704 هەزار و 828 کەسیان لە لەپارێزگای سلێمانین کە دەکاتە 87٪ و ملیۆنێک 102هەزار و 774 کەسیان لە پارێزگای دهۆکن کە دەکاتە 83٪ و 102هەزار و 774 کەسیان لە پارێزگای هەڵەبجەن کە دەکاتە 89٪ کەس.

وتیشی: ئەو هاووڵاتییانەی پرۆسەکەیان ئەنجامنەداوە و خۆیان تۆمارنەکردووە، بەشەخۆراکەکانیان دەبڕدرێت، بەڵام لە کاتی چالاککردنەوەی بەرنامەکەدا دەتوانن خۆیان تۆماربکەن، ئەوەش بە مەرج دەبێت و قەرەبووی بەشەخۆراکە فەوتاوەکانیشیان ناکرێتەوە.

به‌ڕ‌‌ێوه‌به‌ری پسوڵه‌ی خۆراكی سلێمانی راشیگەیاند: لەکاتی چالاککردنەوەی بەرنامەکەدا، پێویستە هاووڵاتیان بە پارە فۆڕمەکانیان پڕ بکەنەوە، کە بۆ هەر هاووڵاتییەک 10 هەزارە و بڕی هەزار دیناری زیادەشی خراوەتە سەر بۆ دروستکردنی نەخۆشخانە و خوێندنگە، بەمەش بڕی پارەکە دەبێت بە 11 هەزار دینار و لەڕێگەی کارتی بانکییەوە دەدرێت.

نزیکەی سێ مانگە پرۆسەی بەئەلکترۆنیکردنی فۆرمی خۆراک لە هەرێمی کوردستان و پارێزگاکانی دیکەی عیراق دەستپێکردووە و چەند جارێکیش پرۆسەکە درێژکراوەتەوە، کۆتا وادەش بۆ پڕکردنەوەی فۆرمەکە سەعات 12:00ی رۆژی 1ی9ی2025 بوو.

PUKMEDIA