به‌شێك له‌میدیای پارتی دژایه‌تی سلێمانی ده‌كه‌ن

PUKMEDIA

پاشماوەی رووداوەکانی هەولێر و سلێمانی

به‌شێك له‌میدیاكانی پارتی به‌ئامانجی سیاسی كار له‌سه‌ر رووداوه‌كانی سلێمانی ده‌كه‌ن، له‌كاتێكدا ناتوانن پیشه‌ییانه‌ رووداوه‌كانی هه‌ولێر و دهۆك بگوازنه‌وه‌، سكرتێری لقی سلێمانی سه‌ندیكای رۆژنامه‌نوسانی كوردستانیش ده‌ڵێت:"گه‌وره‌كردنی هه‌ندێك لایه‌نی رووداوه‌كانی سلێمانی‌ به‌ئامانجێكی سیاسیی، لادانه‌ له ‌پره‌نسیپه‌كانی كاری رۆژنامه‌وانی و ئه‌وه‌ی ئێستاش ده‌بیندرێت له ‌هه‌ندێك كه‌ناڵی هه‌ولێر له‌ رووماڵكردن ده‌رچووه ‌و بووه‌ به‌ بابه‌تی حیكایه‌تخوانی دروستكراو و كاریگه‌ری ده‌روونی خراپی له‌سه‌ر هاووڵاتیان درووستكردوه‌".

میدیاکان لە رووماڵی رووداوەکاندا دووفاقی دەکەن

له‌كاتێكدا ئه‌و میدیایانه‌ له‌ روماڵی هه‌واڵه‌كانی هه‌ولێردا جیاواز مامه‌ڵه‌ ده‌كه‌ن، چاودێران ئاماژه‌ به‌وه‌ ده‌كه‌ن كه‌ له‌پێكدادانی هۆزی هه‌ركییه‌كان و هێزه‌كانی پارتی له‌هه‌ولێر و خۆلادان له‌ روماڵی پیشه‌ییانه‌ی ئه‌و رووداوه‌‌و گه‌وره‌كردنی پرۆسه‌ی چه‌سپاندنی یاسا له‌سلێمانی و ده‌ستگیركردنی له‌یاساده‌رچووانی لاله‌زار، دوو فاقیه‌كی گه‌وره‌ هه‌بووه‌ و بۆ دروستكردنی ئاژاوه‌ له‌ سلێمانی هه‌موو هه‌وڵێك ده‌ده‌ن.

 سەنگی میدیا لەكێشه‌و قه‌یرانه‌كاندا ده‌رده‌كه‌وێت

كاروان ئه‌نوه‌ر، سكرتێری لقی سلێمانی سه‌ندیكای رۆژنامه‌نوسانی كوردستان، به‌ وێبسایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاند: سه‌نگ و قورسایی میدیا له‌كاتی كێشه‌و قه‌یرانه‌كاندا ده‌رده‌كه‌وێت، زۆرجار به‌شێك له‌میدیا كوردییه‌كان له‌كاتی رووماڵی كێشه‌كاندا له‌پره‌نسیپه‌كانی كاری رۆژنامه‌وانی لاده‌ده‌ن، ئه‌مه‌ش حاڵه‌تێكی خراپه‌ و به‌داخه‌وه‌ له‌ئێستادا ژینگه‌ی میدیایی به‌گشتی له‌هه‌رێمی كوردستان بووه‌ به‌ دوو به‌شه‌وه‌، به‌شێكیان به‌ ئامانجێكی دیاریكراو كارده‌كه‌ن و كێشه‌یان بۆ ناو ناوبانگی میدیاكه‌شیان دروستكردووه‌، به‌شه‌كه‌ی دیكه‌شیان ئه‌ركیان گواستنه‌وه‌ی زانیارییه‌.
راشیگه‌یاند: رووماڵكردن به‌پێی پره‌نسیپی كاری میدیایی دیاریكراوه ‌و هه‌موو رووداو و بابه‌تێك رووماڵ ده‌كرێت، به‌ڵام گه‌وره‌كردن و تیشكخستنه‌سه‌ر هه‌ندێك لایه‌نی رووداوه‌كه‌ لادانه‌ له‌پره‌نسیپه‌كانی كاری رۆژنامه‌وانی، ئه‌وه‌ی ئێستاش ده‌بیندرێت له‌ رووماڵكردن ده‌رچووه‌و بووه‌ به‌ بابه‌تی حیكایه‌تخوانی و دروستكردنی كاریگه‌ری ده‌رونی خراپ له‌سه‌ر هاووڵاتیان.
كاروان ئه‌نوه‌ر ئه‌وه‌شده‌خاته‌ڕ‌وو: ئه‌وه‌ی له‌لایه‌ن به‌شێك له‌ میدیاكانی هه‌ولێره‌وه‌ به‌رامبه‌ر به ‌سلێمانی ده‌یكه‌ن و وانیشانی ده‌ده‌ن كه‌ سلێمانی بووه‌ به‌ئاگر، له‌راستیدا وانییه ‌و سلێمانی ئارامه‌، بۆیه‌ ئه‌وه‌ لادان‌ و ده‌رچوونه‌ له‌ هه‌موو پره‌نسیپ و بنه‌ماكانی كاری راگه‌یاندن، ئه‌و پرسیاره‌ش دروستده‌كات كه‌ ئایا ئه‌گه‌ر هه‌مان رووداو له‌هه‌ولێر روویبدایه‌ ئه‌و كه‌ناڵانه‌ به‌مشێوه‌یه‌ رووماڵیان ده‌كرد؟ بێگومان نه‌خێر.

سكرتێری لقی سلێمانی سه‌ندیكای رۆژنامه‌نوسانی كوردستان، وتیشی: له‌ماوه‌ی رابردوو پێكدادانی چه‌كداری له‌سنووری پارێزگای هه‌ولێر روویداو ئه‌و كه‌ناڵانه‌ ته‌نانه‌ت نه‌یانتوانی روماڵی كاریی پیشه‌یی خۆشیان بكه‌ن، به‌ڵام كاتێك رووداوێك له‌ سلێمانی رووده‌دات، هه‌ر زوو به‌رگێكی گه‌وره‌ی به‌به‌ردا ده‌كه‌ن و وا له‌خه‌ڵك ده‌گه‌یه‌نن كه‌ رووداوه‌كه‌ زۆر گه‌وره‌بووه‌، كه‌ له‌راستیدا بێگومان وانییه‌.

 ئەو میدیانە ئاڕاستەکراون

ده‌شڵێت: چه‌ندینجاره‌ ئه‌و میدیایانه‌ به‌ مه‌به‌ست كار له‌سه‌ر تۆقاندن و ترساندن و تێكدانی ده‌رونی خه‌ڵك ده‌كه‌ن و رووداوه‌كان بۆ خزمه‌تی سیاسه‌تێك دیاریكراوی خۆیان روماڵده‌كه‌ن نه‌ك وه‌ك ئه‌وه‌ی كه‌ رووده‌ده‌ن، ئه‌مه‌ش ده‌یسه‌لمێنێت كه‌ ئه‌وانه‌ میدیای ئاڕ‌‌استه‌كراون و وه‌ڵامی ئه‌و پرسیاره‌ش ده‌ده‌نه‌وه‌ ئایا ئه‌وه‌ی ده‌یكه‌ن رووماڵه‌ یاخود بابه‌تی سیاسی؟ كه‌ بێگومان بابه‌تی سیاسیی و حزبییه‌و به‌ئه‌جێندای تایبه‌ت بینه‌ر چه‌واشه‌ ده‌كه‌ن.

به‌شێك له‌ میدیاكان كه‌هه‌ر له‌سه‌ره‌تاوه‌ بۆ ئامانجێكی دیارییكراو دامه‌زراون، كار له‌سه‌ر گه‌وره‌كردن و پچووكردنه‌وه‌ی رووداوه‌كانی هه‌رێمی كوردستان و ته‌نانه‌ت عیراق و ناوچه‌كه‌ش به‌پێی سنووری جوگرافیاو ئامانجی دیارییكراو ده‌كه‌ن و بوونه‌ته‌ هۆكاری تێكچوونی ده‌روونی خه‌ڵك و دروستكردنی ترس و دڵه‌ڕاوكی له‌ناویاندا، هه‌روه‌ها به‌زانیاری ناڕاست و چه‌واشه‌ هه‌وڵی شێواندنی راستییه‌كان ده‌ده‌ن و ئامانجیانه‌ خه‌ڵكی هه‌رێمی كوردستان چه‌واشه‌ بكه‌ن، كه‌ ئه‌مه‌ش ته‌واو پێچه‌وانه‌ی ئیتیك و یاسای كاری رۆژنامه‌گه‌رییه‌و لادانه‌ له‌كاری پیشه‌ییانه‌ی میدیایی.


PUKMEDIA