دایكانی ئاشتی داوای گەرەنتی لە كۆمسیۆنی ئاشتی دەكەن

میدیاکان

دیمەنێکى کۆبوونەوەکە

سەرچاوەكانی راگەیاندن بڵاویانكردەوە، كە لە كۆبوونەوەی دایكانی ئاشتی و دایكانی شەممە لەگەڵ كۆمسیۆنە پەرلەمانیەكەی توركیا بۆ ئاشتی چەند داخوازییەكی گرنگیان خستۆتە بەردەم لیژنەی باڵا و چاوەڕوانن لە چوارچێوەی سەرپێخستنی پڕۆسەی ئاشتیدا ئاوڕ لە داواكارییەكانیان بدرێتەوە.

داخوازییەكانی ئەو وەفدە جۆراوجۆر بوون و لەماوەی چەند سەعاتێكی گفتوگۆكان هەمووی خراوەتەڕوو، بەڵام چاودێران ئاماژە بەوە دەكەن، كە سەرەكیترین داواكارییەكان خۆی لە جێبەجێكردنی بڕیارەكانی دادگای مافی مرۆڤی ئەوروپی و دادگای دەستووریدا دەبینیەوە، هەروەها ئاشكراكردنی دۆسیە هەڵپەسێردراوەكانی گیانلەدەستدانی زیندانیان و قەرەبووكردنەوەی كەسوكاری قوربانیەكان و كۆتاییهێنان بەگرتن و راوەدونان لەسەرەكیترین داواكارییەكان بوون.

دایكانی شەممە كە دایكانی ئاشتی-شیان پێدەوترێت، دایك ‌و كەسوكاری ئەو سیاسەتمەدار و چالاكوانە كوردانەن، كە ساڵانی رابردوو بە تایبەت نەوەدەكانی سەدەی رابردوو لە توركیا و باكوری كوردستان كوژراون، یان بێسەروشوێن كراون‌ و تائێستا ئەنجامدەرانی تاوانەكانیان نادیارن.

ئەوان رۆژانی شەممەی هەموو هەفتەیەك لە مەیدانی گاڵاتاسەرای چالاكیی مەدەنی ئەنجامدەدەن، داواكاریی سەرەكییان ئاشكراكردنی چارەنوسی بێسەروشوێنكراوان‌ و تاوانبارانە.

PUKMEDIA