ناسا: ئاگره‌كه‌ی هه‌ڵه‌بجه‌ هاوشێوه‌ی نه‌بووه‌

PUKMEDIA

وێنەکانى ناسا

به‌گوێره‌ی ده‌زگای ئاسمانی ناسا، كۆی ر‌ووبه‌ری سووتاوی ئاگره‌كه‌ی هه‌ڵه‌بجه‌ (١٥.٩٧كم٢) واته‌ (٦.٣٨٨دۆنم) پوش و پاوان و دارستانی سروشتی و باخ بوو.

كاره‌ساتی ئاگركه‌وتنه‌وه‌كه‌ی پارێزگای هه‌ڵه‌بجه‌

به‌گوێره‌ی راپۆرتێكی ده‌زگای ئاسمانی ناسا، له‌ ر‌ێكه‌وتی (١٧/٨/٢٠٢٥) ئاگرێك له‌ دارستان و ناوچه‌ چیاكانی باشووری شاری هه‌ڵه‌بجه‌ كه‌وته‌وه‌، تاوه‌كو(١٩/٨/٢٠٢٥) بۆماوه‌ی سێ رۆژ به‌رده‌وامبوو، شوێنی ئاگره‌كه‌ له‌سه‌ر بازنه‌ی پانی(٣٥، ١٠٠- ٣٥، ٠٤٦) باكوور و هێڵی درێژی(٤٦، ٠٧١- ٤٥، ٩٩٨) خۆرهه‌ڵات بووه‌، سنووری گونده‌كانی (تله‌وه‌رێ، سازان، گرده‌ناوێ، چناره‌ی كۆكۆیی، نه‌یجه‌ڵه‌، مۆردین، لمه‌، پێگه‌، قولی متكان، كۆساوا) گرته‌وه‌.

به‌پێی راپۆرته‌كه‌، رووبه‌ری ناوچه‌ سوتاوه‌كان له‌ماوه‌ی سێ رۆژدا به‌م شێوه‌یه‌ بووه‌

رۆژی یه‌كه‌م: ر‌ێكه‌وتی(١٧/٨/٢٠٢٥) ر‌ووبه‌ری(٤.٦٤كم٢) سووتاوه‌.
ر‌ۆژی دووه‌م: ر‌ێكه‌وتی(١٨/٨/٢٠٢٥) ر‌ووبه‌ره‌كه‌ بووه‌ته‌ (١١.٥٠كم٢) ، واته‌ ر‌ووبه‌ری(٦.٨٦كم٢) زیادیكردووه ‌و سووتاوه‌.
رۆژی سێیه‌م: ر‌ێكه‌وتی(١٩/٨/٢٠٢٥) رووبه‌ره‌كه‌ به‌رزبووه‌ته‌وه‌ بۆ (١٥.٩٧كم٢)، واته‌ به‌راورد به‌ ر‌ۆژی دووه‌م ر‌ووبه‌ری(٤.٤٧كم٢) زیادیكردووه‌، هاوكات به‌راورد به‌ ر‌ۆژی یه‌كه‌م رووبه‌ری سووتاو بۆ (١١.٣٣كم٢) زیادیكردووه‌.

سه‌باره‌ت به‌ ر‌ێژه‌ی سه‌دی ر‌ووبه‌ری سوتاو ده‌رده‌كه‌وێت كه‌:

رێژه‌ی(٢٩.٠٥٪) ر‌ووبه‌ری سوتاو ده‌كه‌وێته‌ ر‌ۆژی یه‌كه‌م، به‌ڵام ر‌ێژه‌ی (٤٢.٩٦٪) ده‌كه‌وێته‌ ر‌ۆژی دووه‌م، پاشان ر‌ێژه‌ی(٢٧.٩٩٪) سوتانه‌كه‌ ده‌كه‌وێته‌ ر‌ۆژی سێیه‌م، واته‌ كۆی ر‌ووبه‌ری سووتاو(١٥.٩٧كم٢) بووه‌ كه‌ ده‌كاته‌ (٦.٣٨٨ دۆنم) و (١٥٩٧هێكتار).

به‌پێی راپۆرته‌كه‌ی ناسا، ئاگره‌كه‌ كه‌م وێنه‌بووه‌ له‌م سنووره‌ و رێژه‌یه‌كی زۆر دارستان و له‌وه‌ڕ‌گا و ئاژه‌ڵ و باڵنده‌ی كێوی له‌نێوچوون، كه‌ دواجار زیانێكی زۆری به‌ هه‌مه‌جۆری ر‌ووه‌ك و زینده‌وه‌ران گه‌یاندووه‌ و قه‌ره‌بووكردنه‌وه‌ی چه‌ندین ساڵی ده‌وێت.

وێنه‌كانی مانگی ده‌ستكردی هه‌ر سێ رۆژه‌كه‌:

رۆژى یەکەم


رۆژى دووەم


رۆژى سێیەم


ئاماده‌كردنی: رێباز لقمان مسته‌فا/ مامۆستای زانكۆ

PUKMEDIA   سه‌رچاوه‌/ ده‌زگای ئاسمانی ناسا، سیسته‌می به‌ڕ‌ێوه‌بردنی سه‌رچاوه‌ی زانیاری ئاگرFIRMS