له‌ PUKMEDIAهۆكاره‌كانی به‌رزبوونه‌وه‌ی نرخی دۆلار ده‌خرێته‌ڕوو

PUKMEDIA

دۆلار

به‌های دۆلار به‌رامبه‌ر به‌ دینار رووی له‌ به‌رزبوونه‌وه‌ كردووه‌، وته‌بێژی بازاڕ‌ی دراویش له‌ سلێمانی هۆكاره‌كانی ئاشكرا ده‌كات و رایده‌گه‌یه‌نێت: "له‌به‌ر زۆری خستنه‌ڕ‌وو، خواست له‌سه‌ر دینار كه‌میكردووه‌و له‌ به‌رامبه‌ردا خواست له‌سه‌ر دۆلار زیادیكردووه‌".


جه‌بار گۆران وته‌بێژی بازاڕ‌ی دراوه‌كه‌ی سلێمانی، به‌ وێبسایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاند: نزمبوونه‌وه‌ی پێشتری به‌های دۆلار به‌رامبه‌ر به‌ دینار له‌ماوه‌ی رابردوودا، په‌یوه‌ندی به‌ رێكاره‌كانی بانكی ناوه‌ندییه‌وه‌ نه‌بوو، به‌ڵكو ئه‌نجامی  كۆمه‌ڵێك گه‌نده‌ڵی و بازرگانی نادروستی نێوان بانكه‌كانی عیراق و هه‌ندێك له‌ بازرگانه‌كان بوو، له‌ڕ‌ێگای جۆراوجۆره‌وه‌ پاره‌ی زیاتریان بۆ ده‌ره‌وه‌ی عیراق ده‌ناردو جارێكی دیكه‌ پاره‌كه‌یان هاورده‌ی عیراق ده‌كرده‌وه‌و له‌بازاڕ‌ ده‌یانفرۆشته‌وه‌، ئه‌مه‌ش دیناری عیراقی له‌ بازاڕدا كه‌م كردبووه‌وه‌.

راشیگه‌یاند: یه‌كێكی دیكه‌ له‌ هۆكاره‌كانی به‌رزبوونه‌وه‌ی به‌های دۆلار به‌رامبه‌ر به‌ دیناری عیراقی ئه‌وه‌یه‌ كه‌ عیراق به‌ دینار غاز له‌ ئێران ده‌كڕ‌ێت، ئێرانیش دیناری عیراقییه‌كه‌ له‌ناوخۆی عیراقدا جارێكی دیكه‌ ده‌گۆڕ‌ێته‌وه‌ به‌ دۆلار و ئه‌مه‌ش واده‌كات خستنه‌ڕ‌ووی دینار زیاتر بێت و له‌به‌رامبه‌ردا خواست له‌سه‌ر دۆلار له‌بازاڕ‌دا زیادبكات.

هاوكات وته‌بێژی بازاڕ‌ی دۆلاره‌كه‌، ئاماژه‌ی به‌وه‌شكرد: ئه‌و بانكانه‌ی كه‌ پێشتر له‌و جۆره‌ مامه‌ڵه‌ بازرگانیانه‌یان كردووه‌، ره‌نگه‌ سزابدرێن و له‌ئێستاشدا هه‌ندێكیان رێكاری یاساییان به‌رامبه‌ر گیراوه‌ته‌به‌ر، ئه‌وه‌ش هۆكارێكی دیكه‌ی به‌رزبوونه‌وه‌ی نرخی دۆلار و دابه‌زینی به‌های دیناره‌.

ئەمەش لەكاتێكدایە، دوێنێ بەهای 100 دۆلار بەرامبەر بە به 140 هەزار و 500 دینار مامەڵەی پێوەدەكرا، بەڵام ئەمڕۆ  چوارشەممە  20ی8ی2025، 100 دۆلار لە بازاڕەكانی هەرێمی كوردستان به 142 هەزار و 100دینار مامەڵەی پێوەدەكرێت، بەمەش بەشێوەیەكی بەرچاو بەهای دۆلار بەرامبەر بە دینار عیراقی بەرزبووەتەوە، لەكاتێكدا لە ماوەی رابردوودا بەهای دۆلار بەرامبەر بە دینار نزیكبوو لە جێگیر بوون. 

PUKMEDIA