د. بڕیار رەشید: ئەگەری هەیە هەفتەی داهاتوو مووچەی فەرمانبەران خەرج بکرێت

PUKMEDIA

دكتۆر بڕیار ڕەشید ئەندامی ئەنجومەنی نوێنەرانی عیراق

حکومەتی فیدڕاڵی رەزامەندی لەسەر ناردنی مووچەی مانگی شەشی فەرمانبەرانی هەرێمی کوردستان دەربڕی و پەرلەمانتارێکی یەکێتیش رایدەگەیەنێت:"ئەگەری هەیە هەفتەی داهاتوو مووچەی فەرمانبەران خەرج بکرێت".

د. بڕیار رەشید ئەندامی ئەنجومەنی نوێنەرانی عیراق لە فراکسیۆنی یەکێتی لە بارەی ناردنی مووچەی فەرمانبەرانی هەرێم  بە  PUKMEDIA ی راگەیاند: پێویستە ئەم دوو ڕۆژە کارو بارەکان تەواو بکرێن و کۆبونەوەی لیژنەی هەرێم و لیژنە وەزارییەکە بە بەشداری وەزیری دارایی فیدراڵی ئەنجام بدرێت.

پەیوەست بە بەردەوامی ناردنی مووچەی مانگەکانی دیکە، د. بڕیار ئاماژەی بەوەکرد: دەبێت هەرێم بە بەردەوامی  بڕی 120 ملیار دینار بنێرێت، کە وەک داهاتی نانەوتی ئەژمار کراوە.

لەسەر ناکۆکییەکان لەسەر ئەو بڕە کە هەرێم هەوڵی کەمکردنەوەی دەدات، پەرلەمانتارەکەی یەکێتی رایگەیاند: وەفدەکەی هەرێم لە هەوڵدان کە ئەم بڕە کەم بکەنەوە، بەشێکی سەرەکی گفتوگۆکان لەسەر ئەم بڕگەیەیە ، تێڕوانینی جیاواز هەیە لە نێوان بەغداو هەولێر بۆ بڕو جۆری داهاتی نانەوتی هەرێمی کوردستان.

 لە بارەی داواکارییەکانی دیکە بۆ ناردنی مووچەی فەرمانبەران ، د. بڕیار ئاماژەی بەوەشکرد: گرنگە داواکاری کۆمپانیاکانی نەوت دووبارە سەرهەڵنەداتەوە، چونکە لە هەمواری یاسای بوجەدا هاتووە کە دەرهێنان و گواستنەوەی بەرمیلێک نەوت 16دۆلار بێت تاکو لایەنێکی پسپۆڕی نێودەوڵەتیی دەرهێنان و گواستنەوەی هەر کێڵگەیەک بە جیا  خەرجییەکەی هەڵدەسەنگێنێت،بەڵام کۆمپانیاکان گومانیان لەوەیە کە دواتر عیراق وەک پێویست پابەند نەبێت بە پێدانی پارەکانیان.

لە کۆتایشدا ، د. بڕیار رەشید ئەندامی ئەنجومەنی نوێنەرانی عیراق لە فراکسیۆنی یەکێتی رایگەیاند:ئەگەری هەیە تمویل کردنی پارەی پێویست بۆ موچەی موچە خۆران لە هەفتەی داهاتوو ئەنجام بدرێت.

PUKMEDIA