باڵیۆزخانەی ئەمریکا: ئەرکی هاوپەیمانی نێودەوڵەتی لە عیراق دەگۆڕێت

رۆیتەرز

هێزە ئەمریکییەکان لەعیراق

باڵیۆزخانەی ئەمریکا لە بەغدا روونکردنەوەیەکی سەبارەت بە کۆتاییهاتنی ئەرکی هاوپەیمانان بڵاوکردەوە و رایگەیاند: ئەرکی هاوپەیمانیی نێودەوڵەتی لەعیراقدا بۆ هاوبەشییەکی ئەمنیی دوولایەنە دەگۆڕدرێت، ئەمەش کۆتایی کاری هاوپەیمانیی نێودەوڵەتی نییە بۆ شکستپێهێنانی داعش.

لەڕوونکردنەوەیەکدا باڵیۆزخانەی ئەمریکا رایگەیاند:ئەرکی هاوپەیمانیی نێودەوڵەتی لەعیراقدا بۆ هاوبەشییەکی ئەمنیی دوولایەنە دەگۆڕدرێت، ئەمەش کۆتایی کاری هاوپەیمانیی نێودەوڵەتی نییە بۆ شکستپێهێنانی داعش، بەڵکو هەوڵە مەدەنییەکانی بە سەرکردایەتییەکی مەدەنی لەسەر ئاستی جیهان بەردەوام دەبێت.

راشیگەیاندووە، وردەکارییەکانی پەیوەست بە پلان و ئۆپەراسیۆنە سەربازییەکان، رەوانەی وەزارەتی بەرگریی ئەمەریکا دەکرێن و ئەرکی هاوپەیمانی نێودەوڵەتی لە عیراق دەگوازرێتەوە بۆ هاوبەشییەکی ئەمنی دوولایەنە.

هاوکات، حسێن عەللاوی راوێژکاری سەرۆکوەزیرانی عیراق، بە ئاژانسی رەسمی عیراقی راگەیاندووە، بوونی نوێنەرایەتیی هاوپەیمانی نێودەوڵەتی لە بەغدا وعەین ئەسەد لە مانگی ئەیلولدا کۆتایی دێت، لەگەڵ وڵاتانی هاوپەیمانی نێودەوڵەتی رێککەوتنێک کراوە بۆ کۆتاییهێنان بە ئەرکی هاوپەیمانییەکە بەپێی ماوەیەکی ڕاگەیەندراو لە ساڵانی 2025 و 2026.

ئەمەش لەکاتێکدایە، ئەمریکا نزیکەی دوو هەزار و 500 سەربازی لە عیراق هەیە، کە لە چوارچێوەی هاوپەیمانییەکدا لە ساڵی 2014 بۆ بەرەنگاربوونەوەی گروپی تیرۆریستی داعش پێکهێنرابوو.

PUKMEDIA