یەکێتى بە ژمارە 222 بەشدارى هەڵبژاردنى پەرلەمانى عیراق دەکات

PUKMEDIA

لۆگۆى یەکێتیى نیشتمانیى کوردستان

کۆمسیۆنى باڵاى سەربەخۆى هەڵبژاردنەکانى عیراق تیروپشک بۆ پێدانى ژمارە بە حزب و هاوپەیمانى و کاندیدە سەربەخۆکان ئەنجامدا و بە پێى ئەنجامى تیروپشکەکە یەکێتیى نیشتمانیى کوردستان بە ژمارە (222) بەشدارى هەڵبژاردنى ئەنجومەنى نوێنەرانى عیراق دەکات.

 یەکێتیى نیشتمانیى کوردستان لە پارێزگاکانى هەولێر، سلێمانى، دهۆک، هەڵەبجە، کەرکوک و دیالە بە لیستى سەربەخۆ بە ناوى لیستى (یەکێتیى نیشتمانیى کوردستان) بە ژمارە 222 بەشدارى هەڵبژاردنى ئەنجومەنى نوێنەرانى عیراق دەکات، هاوکات لە پارێزگاى نەینەوا لە چوارچێوەى هاوپەیمانێتییەکدا بەناوى (هاوپەیمانى یەکێتى خەڵکى نەینەوا) بە ژمارە 281 بەشدارى هەڵبژاردنەکە دەکات.

هاوکات یەکێتى لە پارێزگاى سەلاحەدین یەک کاندیدى هەیە و لە چوارچێوەى هاوپەیمانى (جەماوەرى نیشتمانى) دا، لە پارێزگاى بەغداش یەکێتیى نیشتمانیى کوردستان یەک کاندیدى هەیە و بەمەش یەکێتى لە هەشت پارێزگاى عیراق کاندیدى بۆ هەڵبژاردنى ئەنجومەنى نوێنەرانى عیراق هەیە، کە تاکە حزبى کوردییە لە زۆرترین پارێزگاى عیراق کاندیدى هەیە.

یەکێتیى نیشتمانیى کوردستان لە بازنەى سلێمانى بە 36 کاندید و لە بازنەى هەولێر بە 30 کاندید و لە بازنەى دهۆک بە5 کاندید و لە بازنەى کەرکوک بە 24 کاندید و لە بازنەى دیالە بە 28 کاندید و لە بازنەى نەینەواش لە چوارچێوەى هاوپەیمانێتییەکدا کە لە  62 کاندید پێکهاتووە، 31 کاندیدیان کاندیدى یەکێتیى نیشتمانیى کوردستانن، بەشدارى هەڵبژاردن دەکات.

هەروەها یەکێتیى نیشتمانیى کوردستان لە بازنەى بەغدا  1کاندید و لە بازنەى سەلاحەدینیش 1 کاندیدى هەیە، کە بەتێکڕا بۆ هەڵبژاردنى ئەنجومەنى نوێنەرانى عیراق بە 156 کاندید بەشدارى هەڵبژاردنەکە دەکات.

رۆژی 9ی4ی2025 ئەنجومەنی وەزیرانی عیراق بە زۆرینەی دەنگ، 11ی 11ی 2025ی وەك رۆژی هەڵبژاردنی داهاتووی ئەنجومەنی نوێنەرانی عیراق دیاریكرد.

PUKMEDIA