كاروان ئه‌نوه‌ر: پێویستە میدیا خۆی به‌دووربگرێت له‌دروستبوونی كێشه‌ی نه‌ته‌وه‌یی

PUKMEDIA

کاروان ئەنوەرسكرتێری لقی سلێمانی سەندیکای رۆژنامه‌نوسانی كوردستان

شه‌وی 6ی8ی2025 ، له‌ به‌نزیخانه‌یه‌كی هه‌ولێر كارمه‌ندی به‌نزینخانه‌كه‌ و شۆفێرێك و سه‌رنشینی ئۆتۆمبێله‌كه‌ ده‌بێته‌ ده‌مه‌قاڵێیان و له‌لایه‌ن كارمه‌ندی به‌نزینخانه‌كه‌وه‌ په‌نا بۆ چه‌ك ده‌برێت و به‌هۆی ته‌قەكردنه‌وه‌ سێ كه‌س گیان له‌ده‌ستده‌ده‌ن، پاشان دیمه‌نی رووداوه‌كه‌ كه‌ له‌لایه‌ن كامێراكانی چاودێرییه‌وه‌ وێنه‌گیرابوون، له‌ كه‌ناڵه‌ میدیاییەکان و سۆشیالمیدیا بڵاوكرانه‌وه‌و ئه‌مه‌ش كاردانه‌وه‌ی زۆری لێكه‌وته‌وه‌، سكرتێری لقی سلێمانی سەندیکای رۆژنامه‌نوسانی كوردستانیش ده‌ڵێت:"پێویسته‌ ئه‌و گرتانه‌ بسڕێنه‌وه‌ بۆ ئه‌وه‌ی كێشه‌ی نه‌ته‌وه‌یی لێنه‌كه‌وێته‌وه‌".

كاروان ئه‌نوه‌ر سكرتێری لقی سلێمانی سەندیکای رۆژنامه‌نوسانی كوردستان به‌ PUKMEDIA ی راگه‌یاند:" له‌ سه‌روبه‌ندی رووداوی به‌نزینخانه‌كه‌ی هه‌ولێر كه‌ له‌چه‌ند شه‌وی رابردوودا روویدا شه‌پۆلێكی راسیزمانه‌ی له‌لایه‌ن ھه‌ردوولاوه‌ لێكه‌وتوه‌ته‌وه‌و رۆژبه‌رۆژ به‌ره‌و ناخۆش و ناخۆشتر ده‌ڕ‌وات و بێھیواین له‌وه‌ی بیری لۆجیك زاڵ ببێت به‌سه‌ر تایه‌فه‌گه‌ریی و تونده‌ڕ‌ه‌ویدا، بۆیه‌ سه‌رباری ئه‌وه‌ی نه‌ده‌بوو ئه‌و ڤیدیۆیه‌ به‌و فراوانییه‌ بڵاوببێته‌وه‌، به‌ڵام ئێستا به‌ناچارییه‌وه‌ داوامان له‌كه‌ناڵه‌كان و تۆڕه‌كۆمه‌ڵایه‌تییه‌كان كردووه‌ ھه‌وڵی ته‌واو بده‌ن ئه‌و گرته‌یه‌ بسڕ‌نه‌وه‌".

راشیگه‌یاند:" ده‌بێت هه‌وڵبدرێت ئه‌و گرتانه‌ی له‌كامێرای چاودێرییه‌وه‌ له‌سه‌ر رووداوه‌كه‌ بڵاوكراوه‌ته‌وه‌ زیاتر كێشه‌ی نه‌ته‌وه‌یی و راسیزمی بۆ ئێمه‌ی كوردو برا عه‌ره‌به‌كانمان دروست نه‌كات، بۆیه‌ گرنگه‌ وه‌ك رووداوێك مامه‌ڵه‌ی له‌گه‌ڵ بكرێت و هه‌وڵبدرێت ئه‌و دیمه‌نانه‌ی ده‌بنه‌ ناخ هه‌ژاندنی بینه‌ر بڵاونه‌كرێنه‌وه‌و بسڕێنه‌وه‌".

سه‌عات 8:30 ده‌قیقه‌ی شه‌وی 6ی8ی2025 ، له‌ به‌نزیخانه‌یه‌كی هه‌ولێر، كارمه‌ندی به‌نزینخانه‌كه‌ و شۆفێرێك و سه‌رنشینی ئۆتۆمبێله‌كه‌ ده‌بێته‌ ده‌مه‌قاڵێیان و له‌لایه‌ن كارمه‌ندی به‌نزینخانه‌كه‌وه‌ ته‌قه‌ ده‌كرێت و به‌هۆیه‌وه‌ سێ هاووڵاتی كوژران، پاشانیش یه‌كێتی له‌شجوانی عیراق له‌راگه‌یه‌نراوێكدا ئه‌وه‌ی ئاشكراكرد:"حه‌مودی ریاز پاڵه‌وانی له‌شجوانی عیراق یه‌كێكه‌ له‌ كوژراوه‌كانی رووداوه‌كه‌و سه‌ره‌خۆشی له‌ سه‌رجه‌م ئه‌ندامانی یه‌كێتییه‌كه‌ و كه‌سوكاره‌كه‌ی ده‌كه‌ین".

PUKMEDIA