هاوكاری هاوپه‌یمانان به‌سه‌ر وه‌زاره‌تی پێشمه‌رگه‌دا دابه‌شده‌كرێت

PUKMEDIA

مووچەی هێزەکانی پێشمەرگە

ئەمڕۆ 7ی8ی2025، هاوكاریی دارایی هاوپەیمانان بۆ مانگی حەوت بەسەر وەزارەتی پێشمەرگەدا دابەشدەكرێت و ئەم مانگە زیاتر لە 74 هەزار سوودمەند لە لیوا هاوبەشەكانی هێزەكانی پێشمەرگە هاوكارییەكان وەردەگرن.

وەزارەتی پێشمەرگەی حكومەتی هەرێم لە راگەیەندراوێكیدا ئاماژەی بەوەكرد:"زیاتر لە 74 هەزار سوودمەند لە لیوا هاوبەشەكانی هێزەكانی پێشمەرگە هاوكارییەكانی هاوپەیمانانی مانگی حەوت وەردەگرن، ئەمەش بەراورد بە مانگی رابردوو بە رێژەیەكی بەرچاو زیادی كردووە و دەستكەوتێكی دیكەیە لە بەهێزكردنی رێككەوتنی نێوان ویلایەتە یەكگرتووەكانی ئەمریكا و وەزارەتی كاروباری پێشمەرگە".

راشیگەیاندووە: "لە كۆی پارێزگاكان 74 هەزار و 400  كەس سوودمەندبوون، هاوكات ژمارەی هێزەكانی یەكە هاوبەشەكانی پێشمەرگە بەپێی پارێزگاكان و ژمارەی سوودمەندان بەمشێوەیە بووە، لە هەولێر 34 هەزار و 900 كەس، لە سلێمانی 15 هەزار و 700 كەس، لە دهۆك 23 هەزار و 800 كەس سوودمەند دەبن".

ئەمەش لەكاتێكدایە، رۆژی 5ی8ی2025 هاوكاریی دارایی هاوپەیمانان بۆ مانگی7تەمویلی وەزارەتی پێشمەرگە كرا و دوای ئەنجامدانی رێكارە دارایی و ژمێریارییەكان لەلایەن بەڕێوەبەرایەتی گشتی بوودجە و بەرنامەكان، ئەمڕۆ دابەشدەكرێت.


PUKMEDIA