تۆمەتبارێکی فێڵ و جادوو لەڕانیە دەستگیرکرا

PUKMEDIA

لۆگۆی ئاسایش

دەزگای ئاسایشی هەرێم،تۆمەتبارێکی خراپ به‌كارهێنانی ئامێره‌كانی په‌یوه‌ندیكردنی دەستگیرکرد، کە هەڕەشەی لە 50 ژن و پیاو کردبوو.

لەڕاگەیەنراوێکدا کە وێنەیەکی بۆ PUKMEDIA نێردراوە، دەزگای ئاسایشی هەرێم رایگەیاندووە:"بەڕێوەبەرایەتی ئاسایشی راپەڕین، لەسەر فەرمانی دادوەری دادگای لێکۆڵینەوەی ئاسایشی راپەڕین، توانیان شوێنی تۆمەتبار دەستنیشان بکەن و لەچالاکییەکەدا تۆمەتبارێک دەستگیر بکەن کەماوەی دووساڵە بەناوی سحر و جادوو، بەمەبەستی بەدەستهێنانی پارە هەڕەشەی لەچەندین ئافرەت و پیاو کردووە".

"تۆمەتبار تەمەنی 25 ساڵانە و دوای دەستگیرکردنی لەلایەن بەڕێوەبەرایەتی ئاسایشی راپەڕین دەستبەسەر سەرجەم ئەکاونت و بەڵگە وێنە و ڤیدیۆکانی گیراوە،  لەئێستادا  بەماددەی2 له‌یاسای قه‌ده‌غه‌كردنی خراپ به‌كارهێنانی ئامێره‌كانی په‌یوه‌ندیكردن راگیراوە و لێکۆڵینەوە لەدۆسیەکەی بەردەوامە"، لەڕاگەیەنراوەکەی دەزگای ئاسایشی هەرێمدا هاتووە.

ئەمەش لەکاتێکدایە، تۆمەتبارەکە لەسەر سکاڵای هاووڵاتیان دوای بەدواداچوون و کۆکردنەوەی زانیاری وورد دەستگیرکراوە، کە لەسەر چەند ئەکاونتێکی تۆڕە کۆمەڵایەتییەکان بەناوی سحر و جادووکردن پارەی لەچەندین هاووڵاتی وەرگرتووە و دواتریش هەڕەشەی بڵاوکردنەوەی وێنە و ڤیدیۆی لەژنەکان کردووە.

PUKMEDIA