دوای بێهیوابوون له‌حكومه‌تی هه‌رێم داوایه‌كی هه‌ڵه‌بجه‌ییه‌كان ئاڕاسته‌ی عیراق ده‌كرێت

PUKMEDIA

بەڕێوەبەرایەتی گشتی تەندروستی هەڵەبجە

دوای ئه‌وه‌ی به‌ڕێوه‌به‌رایه‌تی گشتی ته‌ندروستی هه‌ڵه‌بجه‌ به‌ ره‌سمی داوای كڕینی ئامێری شكاندنی به‌ردی گورچیله‌ی له‌حكومه‌تی هه‌رێمی كوردستان كردو له‌لایه‌ن د.ئومێد سه‌باح سه‌رۆكی دیوانی ئه‌نجومه‌نی وەزیرانەوە  داواكه‌یان ره‌تكردایه‌وه‌، په‌رله‌مانتارێكی یه‌كێتی داوای كڕینی ئامێره‌كه‌ له‌به‌غدا ده‌كات و وه‌ك خۆی ده‌ڵێت:" ئه‌و ئامێره‌ بۆ خزمه‌تی خه‌ڵكی هه‌ڵه‌بجه‌ زۆر گرنگه‌".

چرۆ حه‌مه‌ شه‌ریف ئه‌ندامی په‌رله‌مانی عیراق له‌ فراكسیۆنی یه‌كێتی به‌ PUKMEDIA ی راگه‌یاند:"له‌درێژه‌ی هه‌وڵه‌كانمان بۆ بوژاندنه‌وه‌ی كه‌رتی ته‌ندروستی، به‌ نوسراوی ره‌سمی داوامان له‌وه‌زاره‌تی ته‌ندروستی عیراق كرد كه‌ ئامێری تایبه‌ت به‌ شكاندنی به‌ردی گورچیله‌، بۆ به‌ڕ‌ێوه‌به‌رایه‌تی گشتی ته‌ندروستی هه‌ڵه‌بجه‌ دابینبكات".

ده‌شڵێت:"له‌ئێستادا به‌هۆی ئه‌وه‌ی ئه‌و ئامێره‌ له‌پارێزگاكەدا‌ نییه‌، به‌ناچاری ئه‌و نه‌خۆشانه‌ی به‌ردی گورچیله‌یان هه‌یه‌ ده‌بێت ببرێنه‌ سلێمانی، بۆیه‌ زۆر گرنگه‌ ئه‌و ئامێره‌ بۆ خزمه‌تی خه‌ڵكی هه‌ڵه‌بجه‌ دابینبكرێت".

پێشتر حكومه‌تی هه‌رێم داواكه‌یانی ره‌تكردبووه‌وه‌

ئه‌مه‌ش له‌كاتێكدیه‌، پێشتر له‌لایه‌ن به‌ڕێوه‌به‌رایه‌تی گشتی ته‌ندروستی هه‌ڵه‌بجه‌وه‌ ئه‌و داوایه‌ له‌ ئه‌نجومه‌نی وەزیرانی هه‌رێمی كوردستان كرابوو، به‌ڵام له‌لایه‌ن د.ئومێد سه‌باح سه‌رۆكی دیوانی ئه‌نجومه‌نی وەزیرانەوە داواكه‌ رەتکرابووەوە.

له‌و باره‌یه‌شه‌وه‌ د.ئازاد مسته‌فا به‌ڕ‌ێوه‌به‌ری ته‌ندروستی هه‌ڵه‌بجه‌ پێشتر به‌ PUKMEDIA ی رایگه‌یاندبوو:"سوپاس بۆ ئه‌نجومه‌نی وه‌زیرانی حكومه‌تی هه‌رێمی كوردستان بۆ ره‌تكردنه‌وه‌ی داواكاریمان سه‌باره‌ت به‌ كڕ‌ینی ئامێری شكاندنی به‌ردی گورچیله‌ بۆ ته‌ندروستی هه‌ڵه‌بجه‌، به‌ڵام هیوادارم حكومه‌ت به‌ یه‌ك چاو سه‌یری هه‌موو شاره‌كان بكات".

به‌ڕ‌ێوه‌به‌ری ته‌ندروستی هه‌ڵه‌بجه‌ ده‌شڵێت:"داوا له‌هاوشاریانم ده‌كه‌م ‌رۆژانه‌ زۆر ئاو بخۆنه‌وه، بۆ ئه‌وه‌ی دووربن له‌ به‌ردی گورچیله‌، چونكه‌ به‌ردیان بۆ دروستببێت ئامێری شكاندنی به‌رده‌كه‌مان نییه‌ و ده‌بێت بچنه‌ سلێمانی".

PUKMEDIA