11 ساڵ تێپه‌ڕی و یه‌كێتی به‌ 111 شه‌هید پارێزگاری لە ئێزدییەكان كرد

PUKMEDIA

ئاوارەبوونی دانیشتووانی شەنگال

11 ساڵ بەسەر جینۆسایدی ئێزدییەكان كە لەسەر دەستی تیرۆرستانی داعش بەسەریانداهات تێدەپەڕێت، كە یەكێتیی نیشتمانیی كوردستان بە بەخشینی خوێنی 111 شەهیدی بەرگری لە قەزای شەنگال كرد تا نەكەوێتە دەست تیرۆرستان.

سەرۆك بافڵ: جینۆسایدی ئێزدییەكان لاپەڕ‌ەیەكی رەشی مێژووەو هەرگیز لەیادمان ناچێت

بافڵ جەلال تاڵەبانی، سەرۆكی یەكێتیی نیشتمانیی كوردستان، لە یادی 11 ساڵەی جینۆسایدی ئێزدییەكاندا پەیامێكی بڵاوكردووەتەوە و رایگەیاندووە: "هەرگیز جینۆسایدی ئێزدییەكانمان لەیادمان ناچێت و یەكێتی بەردەوام دەبێت لە پشتگیریكردنی داواكاریی ئێزدییەكان كە گرنگترینیان قەرەبووكردنەوەی ماددی و مەعنەویی كەسوكاری قوربانییان و زیانلێكەوتووانە لەلایەن حكومەتی عیراق و كاركردن بۆ ئاوەدانكردنەوەی شنگال، هیواداریشین ئێزدییەكان بە سەربەرزییەوە بگەڕێنەوە ماڵ و حاڵی خۆیان و بەو ئازیزانەیان شادببنەوە كە لە كاتی روودانی كارەساتەكەوە تاوەكو ئێستاش چارەنووسیان نادیارە.

هێزەكانی یەكێتی بۆ پاراستنی ئێزدییەكان پشتێنەیەكی ئەمنی توندیان بەدەوری چیاكەدا دروستكرد

شێخ ساڵح گەرگەری جێگری مەڵبەندی 7ی نەینەوای یەكێتیی نیشتمانیی كوردستان بە PUKMEDIA ی راگەیاند: "لە رۆژی 2ـی ئابـی 2014، لە كاتێكدا كە ئێزدییەكان جگە لە چیای شەنگال هیچ شوێنێكیان بۆ مانەوە لە ژیان شك نەدەبرد، لە گوندی قەسەریچ كە دەكەوێتە پێش زوممار پێشمەرگەكانی یەكێتی بەرگرییان دەكرد  و 111 شەهیدمان بەخشی لەپێناو پارێزگاریكردن لە ئێزدییەكان".

"لیوای 111ـی هێزەكانی 70 بوو كە خەڵكی شارەكەمان بەرە و چیای شەنگال بەڕێكرد و توانیمان پشتێنەیەكی ئەمنی توندوتۆڵ بەدەوری چیاكەدا لەپێناو پارێزگاری لە ئێزدییەكان دروستبكەین، ئەمەش وایكرد زیاتر لە 300 هەزار ئیزدی رزگار بكەین"، شێخ ساڵح گەرگەری وادەڵێت.

3ـی ئاب شەنگال داگیركرا

رۆژی 3ـی ئابی 2014 تیرۆرستانی داعش هێرشیان كردەسەر قەزای شەنگال و دوای روبەڕ‌ووبونەوەش لەنێوان تیرۆرستان و بەشێك لە پێشمەرگەكان، قەزاكە لەلایەن داعشەوە داگیركرا، دواتر بەشێك لە هاووڵاتیانی ناوچەكە كە زۆرینەیان ئێزدی بوون، لە ترسی كارە قێزەونەكانی تیرۆرستان بەرە و چیای شەنگال هەڵهاتن و بەشێكی تریشیان كەوتنە دەست تیرۆرستانی داعش.

یەكێتی 111 شەهیدی بەشەنگال بەخشی

غەیاس سورچی كارگێڕی مەڵبەندی موسڵ-ی یەكێتی بەسایتی رەسمی یەكێتیی نیشتمانیی كوردستان PUKMEDIA ی راگەیاند:"پێشمەرگەكانی یەكێتی بەو هێزە كەمەی كە لەشەنگال بوون، توانییان بەرگرییەكی زۆر لە داگیركردنی قەزاكە بكەن و لەیەكەم رۆژی داگیركردنی شەنگال كۆمیتەی یەكێتیی نیشتمانیی كوردستان بەخوێنی چوار پێشمەرگەی داگیركرا".

"هاوكات هەر لەبەرگریكردنی لە چیای شەنگالەوە تا ئازادكردنی یەكێتی 111 شەهیدی داوە"، غەیاس سورچی وایوت

یەكێتی بەدیهێنەری مافی ئیزدییەكان بووە

پێشتر لەسەردەستی سەرۆك مام جەلال و ئێستاش سەرۆك بافڵ، یەكێتی هاوكار و پشتیوانی بەدەستهێنانی مافی ئێزدییەكان بووە و بۆ ئەمەش پشتیوانی هەر هەوڵێك دەكات كە كۆمەڵكوژی ئێزدییەكان بە جینۆساید بناسێنێت.

رونزی زیاد ئەندامی فراكسیۆنی یەكێتی لە ئەنجومەنی نوێنەرانی عیراق بە سایتی رەسمیی یەكێتیی نیشتمانیی كوردستان PUKMEDIA ی راگەیاند: "هەمیشە یەكێتی دەستپێشخەر بووە، لە بەدەستهێنانی مافی ئێزدییەكان، لەوچوارچێوەیەشدا لەناوخۆ و دەرەوە هەوڵی جددی داوە، كە كۆمەڵكوژی ئێزدییەكان بە جینۆساید بناسێنێت".

"بە جینۆساید ناساندنی كۆمەڵكوژی ئێزدییەكان لە حكومەتی پێشووی عیراق و تاپۆكردنی زەوی و زار و موڵك و ماڵی ئێزدییەكان لە شەنگال و بەجینۆساید ناساندنی كۆمەڵكوژی ئێزدییەكان لە جیهاندا، لەهەوڵەكانی یەكێتین لەپێناو بەدەستهێنانی مافی ئێزدییەكان"، رونزی زیاد وایوت.
 

مەكتەبی سیاسی: یەكێتی بۆ ئاوەدانكردنەوەی شەنگال و بەجینۆساید ناساندنی لەهەوڵی بەردەوامدایە

مەكتەبی سیاسیی یەكێتیی نیشتمانیی كوردستان لە یانزەیەمین ساڵڕۆژی  جینۆسایدی ئێزدییەكان لە راگەیەنراوێكدا رایگەیاند: " یەكێتیی نیشتمانیی كوردستان پشتیوانی و هاوكاریی خۆی دووپاتدەكاتەوە  بۆ هەر هەنگاوێك كە ببێتە مایەی بوژاندنەوە و سەقامگیری لە شەنگال و بەجینۆسایدناساندنی ئەو تاوانە لە ئاستی نێودەوڵەتیدا" و ئاماژەبەوەشدراوە: "لە هەموو كاتێك زیاتر پێویستمان بە بڕیارێكی یەكگرتوو هەیە، لە نێوان حكومەتی هەرێم و حكومەتی  فیدڕاڵدا كە گشت لایەنەكانی كوردستانیش  پشتگیری و پشتیوانیی لێبكەن  لەپێناوی گەڕاندنەوەی گشت ئاوارەكان بۆ سەر زێدی خۆیان".

"ئێزدییەكان وەك خاوەنی رەسەنی شەنگال و دەوربەری لە بزووتنەوەی كوردایەتیدا هەمیشە پێشەنگ بوون  و رۆڵی پڕ جوامێرانەیان بینیوە، بۆیە بە درێژایی مێژوو لەلایەن داگیركەرانەوە چەندینجار پەلاماردراون و (فرمان) كراوەتە سەریان" لە پەیامەكەی مەكتەبی سیاسی دا هاتووە.

یەكێتیی نیشتمانیی كوردستان بەو ژمارە كەمە پێشمەرگەیەی لەكاتی داگیركردنی شەنگالدا هەیبوو، توانی بەرگرییەكی بێ وێنە بۆ رێگری لەداگیركردنی قەزاكە بكات و بەرگریكرد و 111 شەهیدی بەخشی.

PUKMEDIA