لەتیف نێروەیی: میدیای یەكێتی نیشتمانیانە دەنگی جینۆسایدی ئێزدییەكانی بەجیهان گەیاند

PUKMEDIA

لەتیف نێروەیی لێپرسراوی بۆردی راگەیاندنی یەکێتیی نیشتمانیی کوردستان

لەتیف نێروەیی ئەندامی سەركردایەتی و لێپرسراوی بۆردی راگەیاندنی یەكێتی رایدەگەیەنێت: "پرسی جینۆسایدكردن و فەرمان لەدژی ئێزدییەكان كۆنە و بەداخەوە بەردەوام دووبارە بووەتەوە"، دەشڵێت: "میدیای یەكێتی هاوشانی ئازایەتی پێشمەرگەكانی یەكێتیش، بەرپرسانە و نیشتمانیانە دەنگی كپكراو و جینۆسایدی ئێزدییەكانی بەجیهان گەیاند".

لەتیف نێروەیی ئەندامی سەركردایەتی و لێپرسراوی بۆردی راگەیاندنی یەكێتیی نیشتمانیی كوردستان، لەدیدارێكی تەلەفزیۆنیدا لەگەڵ كەناڵی گەلی كوردستان، رایگەیاند: "یادی یانزەهەمین ساڵەی كۆمەڵكوژكردنی ئێزدییەكان، لە كاتێكدایە كە بەهۆی دابەشبوونی ئێزدییەكان بەسەر ئاڕاستەی جیاوازی سیاسی و حزب و پارتی ناكۆك لەگەڵ یەكتر وایكردووە كە نەتوانرێت پرسە رەواكەیان پێشبخرێن و ئازارەكانیان كەمبكرێنەوە"، ئاماژەی بەوەشكردوە: "كە ئەو ناكۆكیانە بە زیان بۆ شەنگال و خەڵكە قوربانییەكەی گەڕاونەتەوە".

لە دیدارە تەلەفزیۆنییەكەدا سەرەتاكانی كۆمەڵكوژی ئێزدییەكان و ئازایەتی پێشمەرگەكانی یەكێتی وا دەگێڕێتەوە، كە  لە بەرگریكردن و رزگاركردنی دانیشتوانی شارەكە رۆڵیان هەبووە و ژمارەیەكی زۆر پێشمەرگە شەهیدبوون، هەروەها هاوشان لەگەڵ پێشمەرگە میدیاكانی یەكێتی بەرپرسیارانە و نیشتمانیانە توانیان ئازار و خەمی ئێزدییەكان بگوازنەوە و بە رای گشتی دنیای بگەیەنن.

دەشڵێت: "ئەگەر لە قۆناغی بەرگریدا یەكێتی لە پێشەوەی سەنگەرەكانی بەرگری بووبێت، ئەوە لە قۆناغی دوای بەزاندنی داعش، یەكێتی هێزی گەڕاندنەوەی سەقامگیری بۆ شەنگال و ئاوەدانكردنەوەی دەبێت و لە پەیامی سەرۆك بافڵ تاڵەبانی و مەكتەبی سیاسی هەمیشە ئەو بنەمایە دووپاتكراوەتەوە".

رۆژی 3ـی ئابی 2014 تیرۆرستانی داعش هێرشیان كردەسەر قەزای شەنگال و دوای رووبەڕ‌ووبونەوەش لەنێوان تیرۆرستان و بەشێك لە پێشمەرگەكانی ئەو قەزایە، بەڵام قەزاكە لەلایەن داعشەوە داگیركرا و ئەمڕۆش 11 ساڵ بەسەر ئەو پەلاماردانەدا تێدەپەڕێت.

PUKMEDIA