کار بۆ ئامادەکردنی رێبەری دەرفەتەکانی وەبەرهێنان لە گەشتوگوزاردا دەکرێت

راگەیاندنى دەستەى گەشتوگوزارى هەرێمى کوردستان

وێنەیەکى کۆبوونەوەکە

دەستەی گەشتوگوزار و دەستەی وەبەرهێنان کار بۆ ئامادەکردنی رێبەری دەرفەتەکانی وەبەرهێنان لە کەرتی گەشتوگوزار دەکەن و دەستەی گەشتوگوزار رایگەیاندووە : "لە ئێستادا لە قۆناغەکانی کۆتاییدان".

ئەمڕۆ چوارشەممە 30ى7ى2025، دەستەی گەشتوگوزار لە راگەیەنراوێکدا ئاماژەیبەوەداوە: "بە ئامادەبوونی ئەمەل جەلال، سەرۆکی دەستەی گەشتوگوزار و دلێر محمد، بەڕێوەبەری گشتیی گەشتوگوزاری هەولێر، لە دیوانی دەستەی گەشتوگوزار کۆبوونەوەیەکی تایبەت بە دوا قۆناغەکانی ئامادەکردنی (رێبەری دەرفەتەکانی وەبەرهێنان لە کەرتی گەشتوگوزار) بەڕێوەچووە".

ئەوەشخراوەتەڕوو: "کۆبوونەوەکە بە بەشداری ژمارەیەک بەڕێوەبەر لە دیوانی دەستە و بەڕێوەبەرانی پلاندانان و ئەندازیاری لە بەڕێوەبەرایەتییە گشتییەکانی گەشتوگوزار و نوێنەرانی دەستەی وەبەرهێنان بەڕێوەچووە و تیایدا گفتوگۆکراوە سەبارەت بە ناوەڕۆکی رێبەری وەبەرهێنانی گەشتیاری کە لە لایەن دەستەی وەبەرهێنانەوە بە هەماهەنگی دەستەی گەشتوگوزار کاری لە سەر کراوە و لە ئێستادا لە قۆناغەکانی کۆتایی دایە".

لە راگەیەنراوەکەدا ئەوەش روونکراوەتەوە: "ئەمەل جەلال سەرۆکی دەستەی گەشتوگوزار، بە بایەخەوە باسی لە بوونی رێبەرێک کردووە کە تیایدا دەرفەتەکانی وە بەرهێنان لە کەرتی گەشتیاری هەرێمی کوردستان بخاتەڕوو بە ئامانجی راکێشانی سەرنجی وەبەرهێنەرانی ناوخۆیی و نێودەوڵەتیى".


PUKMEDIA