عیراق 92 ساڵه‌ وشكه‌ساڵی وه‌ك ئه‌مساڵی به‌خۆیه‌وه‌ نه‌بینیوه‌

هۆگر ئەحمەد

وشکبوونی زەوی

میدیا عیراقییه‌كان له‌پێوانه‌ و به‌راوردكردنی وشكه‌ساڵی  له‌چه‌ند راپۆرتێكدا ئاماژه‌ به‌وه‌ ده‌كه‌ن، كه‌ له‌ ساڵی (1933)ه‌وه‌ یه‌كه‌مجاره‌ عیراق بگات به‌و ئاسته‌ به‌رزه‌ی وشكه‌ ساڵی، وته‌بێژی وه‌زاره‌تی سه‌رچاوه‌ ئاوییه‌كانیش هۆكاره‌كه‌ی بۆ كه‌میی بارانبارین و كه‌مبوونه‌وه‌ی سەرچاوەی ئاویی وڵاتانی سه‌ر رووباره‌كان (توركیا و ئێران و تاڕ‌اده‌یه‌ك سوریا) ده‌گه‌ڕ‌ێنێته‌وه‌. 

د.خالید شمال وته‌بێژی وه‌زاره‌ته‌كه‌ رایگه‌یاندووه‌:" ئه‌مساڵ یه‌كێكه‌ له‌ وشكترین ساڵه‌كانی عیراق و له‌ دوای ساڵی (1933)وه‌ هیچ ساڵێك قه‌یرانه‌كه‌ نه‌گه‌یشتووه‌ به‌و ئاسته‌".

 ئاماژه‌ی به‌وه‌شكرد:" تێكڕ‌ای داهاتی ئاو كه‌ ده‌گاته‌ حه‌وزی دیجله‌ و فورات، به‌ به‌راورد به‌ ساڵی رابردوو به‌ رێژه‌ی 27 % كه‌میكردووه‌ و ئێستا گلدانه‌وه‌ی ئاو له‌ به‌نداو و كۆگاكاندا 8%ی كۆی توانای هه‌ڵگرتن پێكده‌هێنێت، كه‌ به‌راورد به‌ ساڵی رابردوو به‌ڕ‌ێژه‌ی %57 كه‌میكردووه‌.

هه‌ر له‌و باره‌یه‌وه‌، لوئه‌ی موختار وته‌بێژی وه‌زاره‌تی ژینگه‌، له‌ راگه‌یه‌نراوێكدا رایگه‌یاندووه‌:"پارێزگاكانی باشوور وه‌ك به‌سره‌ و میسان و زیقار، زۆرترین زیانیان به‌ركه‌وتووه‌ به‌هۆی گۆڕ‌انی كه‌شوهه‌وا و زۆربه‌ی هۆڕ‌ه‌كانیان وشكیان كردووه‌".

وشكه‌ساڵی هه‌رێمی كوردستانیشی گرتووه‌ته‌وه‌و به‌هۆی بێبارانییه‌وه‌ چه‌ندین شه‌لال و كانی و سه‌رچاوه‌ی ئاو وشكیان كردووه‌، ئه‌مه‌ش كاریگه‌ری كردووه‌ته‌ سه‌ر رێژه‌ی ئاو له‌هه‌ردوو به‌نداوی دوكان و ده‌ربه‌ندیخان و ئاوی هه‌ردوو به‌نداوه‌كه‌ به‌راورد به‌چه‌ند ساڵی رابردوو به‌شێوه‌یه‌كی زۆر ئاوه‌كه‌یان كه‌می كردووه‌.

PUKMEDIA