پەرلەمانتارێكی یەكێتی 22 گەنج لەلیبیاوە دەگەڕێنێتەوە هەرێم

ئاژانسی هەواڵی AFP

كۆچبەران

پەرلەمانتارێكی یەكێتی 22 گەنجی دانیشتووی دەڤەری راپەڕینن دەگەڕێنێتەوە هەرێمی كوردستان، كە لەلیبیا گیریانخواردبوو، دەیانویست  بە رێگای ئاوی خۆیان بگەیەننە سنوورەكانی ئیتاڵیا.

غەریب ئەحمەد ئەندامی ئەنجومەنی نوێنەرانی عیراق لە فراكسیۆنی یەكێتی، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "بەهۆی هەوڵە بەردەوامەكانمان لە ماوەی رابردوودا توانیمان زیاتر لە 22 گەنجی هەرێمی كوردستان كە زۆربەیان دانیشتووی دەڤەری راپەڕینن و لە وڵاتی لیبیا گیریانخواردبوو، بیانگەڕێنینەوە بۆ هەرێمی كوردستان".

"ئەو گەنجانە ماوەی نزیكەی مانگێك بوو بێهەواڵ بوون و پاش ئەوەی خانەوادەكانیان ئاگاداریانكردینەوە كە نەوەكانیان لە وڵاتی لیبیا بێسەروشوێن بوون، راستەوخۆ لەگەڵ باڵیۆزی عیراق لە لیبیا كەوتینە گفتوگۆ و توانیمان لە ماوەیەكی كەمدا سەرجەمیان بدۆزینەوە و بیانگەڕێنینەوە بۆ ژێر دەسەڵاتی پۆلیسی فیدراڵی ئەو وڵاتە" غەریب ئەحمەد وادەڵێت.

پەرلەمانتارەكەی یەكێتی راشیگەیاند: "لە ئێستادا بەشێك لەو گەنجانە گەیشتوونەتەوە هەرێمی كوردستان و بە خانەوەادەكانیان شادبوونەتەوە، هاوكات ئەو ژمارە كەمەشیان كە ماون رێكارە یاساییەكانیان تەواو بووە و لە چەند رۆژی ئایندەدا دەگەڕێنەوە بۆ هەرێمی كوردستان".

لە بەرامبەر ئەم كارەشدا، خانەوادەی گەنجەكان سوپاسی پەرلەمانتارەكەی یەكێتی دەكەن و هەوڵەكانی بۆ ئازادكردنی نەوەكەنیان و گەڕاندنەوەیان بۆ خاكی هەرێمی كوردستان بەرز دەنرخینن.

ماوەیەكە بەشێك لە گەنجانی هەرێمی كوردستان بۆ گەیشتنیان بە وڵاتانی ئەوروپا رێگەیەكی مەترسیدار دەگرنەبەر و دەچنە وڵاتی لیبیا و پاشان دەیانەوێت بە رێگەی ئاوی خۆیانبگەیەننە سنوورەكانی ئیتاڵیا، لە بەرامبەر ئەم كارەشدا پەرلەمانتارەكەی یەكێتی جەخت لە مەترسی رێگاكە دەكاتەوە و ئاماژە بەوەدەكات: "لەگەڵ ئەوەی رێگە ئاوییەكە مەترسی زۆری تێدایە، هاوكات بارودۆخی لیبیاش بۆ گەشتكردن گونجاو نییە و پێویستە حكومەتی هەرێمی كوردستان رێگاچارەیەك بۆ كۆچی نایاسایی گەنجان بگرێتەبەر".

PUKMEDIA