وه‌فدی ئیمراڵی: په‌یامی ئۆجه‌لان سوربوونه‌ له‌سه‌ر ئاشتی

ئەرشیف

کۆبوونەوەی ئۆجه‌لان و وەفدی ئیمراڵی

دوای ئه‌وه‌ی دوێنێ 25ی7ی2025 وه‌فدێكی ده‌م پارتی، له‌ سه‌ردانێكی رانه‌گه‌یه‌ندراودا له‌گه‌ڵ عه‌بدوڵا ئۆجه‌لان رێبه‌ری زیندانی كراوی پارتی كرێكارانی كوردستان كۆبووه‌وه‌، ئه‌مڕ‌ۆ راگه‌یه‌ندراوێكی سه‌باره‌ت به‌ كۆبوونه‌وه‌كه‌ بڵاوكرده‌وه‌و رایگه‌یاند:" له‌ گرتووخانه‌ی ئیمراڵی، دیدارێكی سێ سه‌عات و نیویمان له‌گه‌ڵ عه‌بدوڵڵا ئۆجه‌لان ئه‌نجامدا و بیروبۆچوونمان له‌باره‌ی ئه‌و دیدارانه‌وه‌ ئاڵوگۆڕ‌ كرد، كه‌ له‌ رۆژانی رابردوودا وه‌ك وه‌فد له‌گه‌ڵ سه‌رۆككۆمار و وه‌زیری داد و سه‌ركرده‌ی پارته‌ سیاسییه‌كان-دا ئه‌نجامماندابوو".

هه‌ر له‌ڕ‌اگه‌یه‌نراوه‌كه‌دا ئه‌وه‌شخراوه‌ته‌ڕوو:" ئۆجه‌لان سه‌رنج و كاردانه‌وه‌كانی بۆ جێبه‌جێكردنی پرۆسه‌ی ئاشتی و چەكدانان خسته‌ڕ‌وو وتی: شێوازی به‌ڕ‌ێوه‌چوونی رێوڕ‌ه‌سمه‌كه‌ و ئه‌و ئیراده‌ و باوه‌ڕ‌ و سووربوونه‌ له‌سه‌ر ئاشتی كه‌ نیشاندراون، زۆر به‌بایه‌خ ده‌زانێت و چاوه‌ڕ‌وانه‌ كاری ئه‌و كۆمسیۆنه‌ی له‌ كارنامه‌ی په‌رله‌مانی توركیادایه‌، به‌ رێبازێكی گشتگیر و هه‌مه‌لایه‌نه‌، له‌پێناو ئاشتی و دیموكراسیدا به‌شداریی گرنگی هه‌بێت".

رۆژی 11ی7ی2025، له‌چوارچێوه‌ی پرۆسه‌ی ئاشتی و جێبه‌جێكردنی هه‌نگاوه‌كانیدا، گروپێكی گه‌ریلاكانی پارتی كرێكارانی كوردستان (په‌*كه‌*كه‌)، به‌ناوی (ئاشتی و كۆمه‌ڵگه‌ی دیموكراتی) له‌ڕ‌ێوڕ‌ه‌سمێكدا له‌ ئه‌شكه‌وتی جاسه‌نه‌ له‌ سنووری پارێزگای سلێمانی چه‌كه‌كانیان دانا، كه‌ له‌جۆری ( كڵاشینكۆڤ و بیكه‌یسی و نیشانه‌شكێن) بوون، ئه‌مه‌ش به‌ هه‌نگاوی یه‌كه‌می جێبه‌جێكردنی پرۆسه‌كه‌ و چه‌ك دانان دانرا.


PUKMEDIA