چوارچێوەی هەماهەنگی ئیدانەی هێرشەکانی سەر هەرێم دەکات

نوسینگەی راگەیاندنی چوارچێوەی هەماهەنگی

کۆبوونەوەی چوارچێوەی هەماهەنگی

چوارچێوەی هەماهەنگی بەردەوامیی بۆردومانکردنی کۆمپانیا نەوتییەکانی هەرێمی کوردستانی ئیدانە دەکات و داوای لێکۆڵینەوەی تەواویش لە ئاگرکەوتنەوەکەی کوت-ی سەر بە پارێزگای واست دەکات.

ئەمڕۆ دووشەممە 21ی تەمموزی 2025، بە ئامادەبوونی محەمەد شیاع سودانی سەرۆکوەزیرانی عیراق چوارچێوەی هەماهەنگی 235هەمین کۆبوونەوەی ئاسایی خۆی لەسەر ئاستی سەرکردایەتی لە نووسینگەی هادی عامری ئەنجامدا و بەپێی راگەیەندراوێکی نووسینگەی rاگەیاندنی چوارچێوەی هەماهەنگی-ش کە وێنەیەکی دەست PUKMEDIA کەوتووە، لە کۆبوونەوەکەدا باس لە "دواین پێشهاتە سیاسی و ئەمنی و ئابوورییەکان" کراوە، هاوکات "چوارچێوەی هەماهەنگی ئیدانەی بەردەوامی بۆردومانەکانی کردووە کە کۆمپانیاکانی نەوتی هەرێمی کوردستان دەکەنە ئامانج، بەو پێیەی مەترسی راستەوخۆ بۆ سەر سامانی نیشتمانی و بەرژەوەندی گشتی دروست دەکات، ژینگەی وەبەرهێنان تێکدەدات، هەروەها هێرشێکی ئاشکرایە بۆ سەر سەقامگیری".

هەر لەڕاگەیەنراوەکەدا، داوا لە حکومەت کراوە هەڵوێستێکی یەکلاکەرەوەی هەبێت بۆ ئاشکراکردنی ئەوانەی لە پشت ئەم هێرشانەوەن و رێگری لە دووبارەبوونەوەی ئەو هێرشانە بکەن".

ئاماژە بەوەشکراوە، "چوارچێوەی هەماهەنگی خەمخۆری خۆی بۆ ئاگرکەوتنەوە کارەساتبارەکەی واست دەربڕی، کە بەهۆیەوە ژمارەیەک کەسی بێتاوان گیانیان لەدەستداوە وداواشیکرد لێکۆڵینەوە لە هەموو ئەو کەسانە بکرێت کە کەمتەرخەمییان کردووە".

PUKMEDIA