جێگری سەرۆکی هەرێم: پێویستە چارەسەری کێشەکانی نێوان هەرێم و بەغدا بکرێت

نوسینگەی راگەیاندنی شێخ جەعفەر شیخ مستەفا

شێخ جەعفەر شێخ مستەفا و ستیڤن بیتنەر

ئەمڕۆ دووشەممە 21ی7ی2025 شێخ جەعفەر شێخ مستەفا جێگری سەرۆکی هەرێمی کوردستان پێشوازی لە ستیڤن بیتنەر کونسوڵی گشتیی ئەمریکا لە هەرێمی کوردستان کرد.


لە کۆبوونەوەکەدا دوایین پێشهاتەکان و بارودۆخی سیاسیی و ئەمنی ناوچەکە، پڕۆسەی چاکسازیی و ڕێکخستنەوەی پێشمەرگە، چارەسەرکردنی کێشەکانی نێوان حکومەتی عیراق و هەرێم، باسیان لێوەکرا.


هەر لەو کۆبوونەوەیەدا هەردوولا جەختیان لە پەیوەندییەکانی نێوان ئەمریکا و هەرێمی کوردستان کردەوە، هەروەها هاوڕابوون کە دەبێت کێشەکانی نێوان هەولێر و بەغدا لەسەر بنەمای گفتووگۆ و لێکتێگەیشتن لە چوارچێوەی دەستوور چارەسەر بکرێن.


لە تەوەرێکی دیکەی گفتوگۆکاندا جێگری سەرۆکی هەرێم، تیشکی خستەسەر مەترسییەکانی داعش لە ناوچەکەدا و جەختی لە گرنگی هەماهەنگیی زیاتری نێوان پێشمەرگە و سوپای عیراق و هێزی هاوپەیمانان کردەوە، لەپێناو پاراستن و سەقامگیری ئاسایشی ناوچەکە.


هەڵبژاردنی داهاتووی ئەنجوومەنی نوێنەرانی عیراق، گۆڕانکاریی و پەرەسەندنەکانی دۆخی سوریا و کێشە و ئاڵۆزییەکانی ڕۆژهەڵاتی ناوەڕاست، تەوەرێکی دیکەی گفتووگۆکان بوو.

PUKMEDIA