بۆ دووەمجار هێرشى درۆنى کرایە سەر کێڵگەى نەوتى شێخان

PUKMEDIA

وێنەیەکى هێرشى درۆنى

ئەمڕۆ چوارشەممە 16ى7ى2025 بۆ دوومینجار هێرشى درۆنى کرایە سەر  سەر کێڵگەى نەوتى شێخان.

بە گوێرەى زانیارییە میدیاییەکان ئێوارەى ئەمڕۆ بۆ جارى دووەم هێرشى درۆنى کرایە سەر کێڵگەى نەوتى شێخان، هیچ زیانێکى گیانى نەبووە و زیانى ماددى هەبووە.

هێرشى یەکەمیان بۆ سەر کێڵگە نەوتییەکە لەبەرەبەیانى ئەمڕۆدابوو، دووەمیشیان لە ئێوارەدا بوو. 

سەبارەت بەو هێرشە درۆنییە وەزارەتی سامانە سروشتییەكانی حكومەتی هەرێمی كوردستان،  راگەیانراوێکی بڵاوکردەوە و رایگەیاند: " ئێوارەی ئەمڕۆ چوارشەممە رێكەوتی 16ی تەمووزی 2025 سەعات (7:10)ی  ئێوارە بۆ جاری دووەم لە رێگەی درۆنی بۆمبڕێژكراوەوە، هێرش كرایەوە سەر كێڵگەی نەوتی هانت ئویلی ئەمەریكی لە باعەدرێ لە قەزای شێخانی سەر بە پارێزگای دهۆك، كە جگە لە زیانی ماددی هیچ زیانێكی گیانیی لێ نەكەوتووەتەوە".

"وەزارەتی سامانە سروشتییەكان نیگەرانییەكی قووڵی لە بەردەوامبوونی ئەم هێرشانە هەیە و بە توندی ئەم هێرشە تیرۆریستییانە ئیدانە و شەرمەزار دەكات، كە دەكرێتە سەر دامەزراوەكانی وزە لە هەرێمی كوردستان و مەترسیی لەسەر هاوڵاتییانی ئەم ناوچانە و سەلامەتی كارمەندانی مەدەنی كەرتی وزە دروست دەكات، لەهەمان كاتدا دووبارە بانگەوازی هەموو لایەنی پەیوەندیدار لە حكومەتی فیدراڵی و كۆمەڵگەی نێودەوڵەتی دەكەین كە بێنە سەر خەت بۆ پاراستنی گیانی هاوڵاتیانی سیڤلی ناوچەكە و كارمەندانی مەدەنی و ئەمنییەتی وزە و رێگرتن لە هێرشی دیكە بۆ سەر كەرتی وزەی كوردستان"، لەڕاگەیەنراوەکەدا هاتووە.

هەر لەراگەیەنراوەکەدا وەزارەتی سامانە سروشتییەکان ئاماژەی بەوەشکردووە: "هێرشە درۆنییەكانی 14و 15و 16ی تەمووزی 2025 بۆ سەر ژێرخانی ئابووری و كێڵگە نەوتییەكانی (خۆرمەڵە و سەرسنگ و بیشخاپوور و عین سفنی) لە پارێزگای هەولێر و پارێزگای دهۆك و ئیدارەی سەربەخۆی زاخۆ زیانی ماددیی گەورەی لەسەر ئاستی بەرهەمهێنانی نەوت دروست كردووە، بۆیە جارێكی دیكە داوا دەكەین كە حكومەتی فیدراڵی بە ئەركی خۆی هەڵسێت بۆ ئەوەی سنوورێك بۆ ئەم هێرشانە دابنرێت".


PUKMEDIA