پارێزگاری كەركوك لە كێشەی لابردنی خیمەی مامۆستایان دەكۆڵێتەوە

PUKMEDIA

رێبوار تەها پارێزگاری کەرکوک

رێبوار تەها پارێزگاری كەركوك، ئەنجومەنێكی لێكۆڵینەوە لەبارەی ئەو هێزانەی خێوەتی مامۆستایانیان لە شارەكە هەڵوەشاندەوە پێكدەهێنێت و دەڵێت: "دەرگای نوسینگەكەمان كراوەیە بۆ پێدانی مۆڵەتی خۆپیشاندان و گردبوونەوە".

ئەمڕۆ چوارشەممە، لە راگەیەندراوێكدا پارێزگاری كەركوك دەڵێت: "پشتیوانی تەواوی داواكارییەكانی مامۆستا و فەرمانبەرانی هەرێمی كوردستان لە كەركوك دەكەین، هەرچەندە چارەسەركردنی مووچە لە روی ئیدارییەوە لەلای ئێمە نییە".

"پێشتر هەوڵمانداوە كێشەكەیان چارەسەربكەین و چەندین نوسراومان ئاڕاستەی وەزارەتی دارایی و ئەنجومەنی وەزیرانی عیراق كردووە بۆ گواستنەوەی راژەیان بۆ سەر حكومەتی فیدڕاڵی" لە راگەیەندراوەكەی پارێزگاردا هاتووە.

 بەگوێرەی  فەرمانێكی كارگێڕی كە ئەمڕۆ 16ی 7ی 2025، بە ئیمزای رێبوار تەها دەرچووە و كۆپییەكی لەبەردەست PUKMEDIA دایە، لیژنەیەكی پێنج كەسی لەلایەنە پەیوەندیدارەكان پێكهێناوە كە فەرماندەی پۆلیسی كەركوك سەرۆكی لیژنەكەیە بۆ لێكۆڵینەوە لەلابردنی خێمەكە.  

ڕێبوار تەها لەبارەی لابردنی خێمەی  مامۆستا و فەرمانبەرانی هەرێمی كوردستان لە كەركوك  دەڵێت: "فەرمانمان كرد بە پێكهێنانی ئەنجومەنی لێكۆڵینەوە دەرهەق بەو هێزانەی خێوەتی مامۆستایانیان هەڵوەشاندەوە".

لە راگەیەندراوەكەدا تەئكید كراوەتەوە كە گردبوونەوە مافی خۆیانە بۆ بەدەستهێنانی  شایستە داراییەكانیان، بەڵام بەپێی رێكارەكان و دەرگای نوسینگەكەیان كراوەیە بۆ پێدانی مۆڵەتی خۆپیشاندان و گردبوونەوە، پاراستنیشیان لە ئەستۆی هێزەئەمنییەكان دەبێت. 

PUKMEDIA