پەرلەمانتارێكی یەكێتی لە بەرژەوەندی شۆفێران داوایەك لە سودانی دەكات

ميدياكان

بارهەڵگر

ئەندامێكی فراكسیۆنی یەكێتی لە ئەنجومەنی نوێنەران رایدەگەیەنێت: "داوامان لە سەرۆكوەزیرانی عیراق كردووە پەلە لەكردنەوەی نووسینگەی گومرك لە بازگەی باوە مەحمود بكرێت، بۆ ئەوەی شۆفێرانی بارهەڵگر لە دەروازەی پەروێزخانەوە راستەوخۆ كاڵاكانیان بگوازنەوە بۆ ناوەڕاست و باشووری عیراق".

د. بڕیار رەشید، ئەندامی ئەنجومەنی نوێنەرانی عیراق لە فراكسیۆنی یەكێتی، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لەسەر داواكاری هاووڵاتیان و سەدان شۆفێری بارهەڵگر و بازرگانان، نووسراوێكمان ئاڕاستەی محەمەد شیاع سودانی، سەرۆكوەزیرانی عیراق كرد و داوامان لێكرد ئاسانكاری بۆ كردنەوەی نووسینگەی گومرك لە بازگەی باوە مەحمود بكرێت، بۆ ئەو مەبەستەش ئیمزای پێویستمان لە ژمارەیەك لە ئەندامانی ئەنجومەنی نوێنەران كۆكردووەتەوە".

"بە كردنەوەی نووسینگەی گومرك لە بازگەی باوە مەحمود، شۆفێرانی بارهەڵگر سوودمەند دەبن، چونكە 450 كم لە رێگەكەیان بۆ كورتدەكاتەوە و دەتوانن راستەوخۆ لە دەروازەی پەروێزخانەوە كاڵاكانیان بگوازنەوە بۆ ناوەڕاست و باشووری عیراق" د. بڕیار رەشید وایوت.

بازگەی باوە مەحمود دەكەوێتە سەر رێگای نێوان كەلار خانەقین و باكوری قەزای خانەقین.

PUKMEDIA