لێکتێگەیشتنی نوێ لەنێوان حکومەتی هەرێم و بەغدا دێتە ئاراوە

راگەیاندنی ئەنجومەنی وەزیرانی هەرێم

کۆبوونەوەی ئەنجومەنی وەزیرانی حکومەتی هەرێمی کوردستان

لەدوای سەردانی بافڵ جەلال تاڵەبانی سەرۆکی یەکێتیی نیشتمانیی کوردستان، بۆ بەغدا و کۆبوونەوە لەگەڵ سەرۆک وەزیرانی عيراق  لێکتێگەیشتنی نوێ لەنێوان هەرێم و بەغدا هاتە کایەوە و ئەنجومەنی وەزیرانیش لە کۆبوونەوەی ئەمڕۆیدا رایگەیاند:"پێشوازیی لەو لەیەکترتێگەیشتنە دەکەین"، هاوکات "بڕیاری دا بە جێبەجێکردنی ناوەڕۆکی ئەو لەیەکترتێگەیشتنە، کە بڕیارە لە بەرامبەردا حکومەتی فیدراڵ، مووچە و شایستە داراییەکانی هەرێمی کوردستان بنێرێت".

ئەمڕۆ چوارشەممە 16ی تەممووزی 2025، بە سەرپەرشتيی سەرۆک وەزیران مەسرور بارزانی و ئامادەبوونی قوباد تاڵەبانی جێگری سەرۆک وەزیران، ئەنجومەنی وەزیرانی هەرێمی کوردستان کۆبووەوە و گفتوگۆ لەبارەی تەوەر و بابەتی کۆبوونەوەکە کرا، کە تایبەت بوو بە تاووتوێکردنی بارودۆخی دارایيی هەرێمی کوردستان و رێڕەوی دانوستان و گفتوگۆکان لەگەڵ حکومەتی فیدراڵ، سەبارەت بە مووچە و شایستە داراییەکانی هەرێمی کوردستان.

هاوکات سەرۆک وەزیران و جێگری سەرۆک وەزیران، وردەکاريی ئەو لەیەکترتێگەیشتنە هاوبەشەی کە دوێنێ لە بەغدا تایبەت بە دابینکردنی شایستە داراییەکانی هەرێمی کوردستان و پابەندییەکانی هەرێم هاتووەتە ئاراوە خستەڕوو.

دوای گفتوگۆ و ڕاگۆڕینەوە، ئەنجومەنی وەزیران پێشوازیی لەو لەیەکترتێگەیشتنە کرد و بڕیاری دا بە جێبەجێکردنی ناوەڕۆکی ئەو لەیەکترتێگەیشتنە، کە بڕیارە لە بەرامبەردا حکومەتی فیدراڵ، مووچە و شایستە داراییەکانی هەرێمی کوردستان بنێرێت.


PUKMEDIA