ئەمریکا: هێرشە درۆنییەکان بۆ سەر هەرێم قبوڵ ناکەین

میدیاکان

کونسوڵخانەی ئەمریکا لە هەولێر

ماوەیەکە هێرشە درۆنییەکان بۆ سەر ناوچە جیاوازەکانی هەرێمی کوردستان زیادیکردووە، کونسوڵخانەی ئەمریکاش لە هەولێر رایدەگەیەنێت:" هێرشەکان جێگای قبوڵ نین".

کونسوڵخانەی ئەمریکا لە هەولێر، راگەیەندراوێکی لەسەر هێرشە مووشەکییەکانی سەر هەرێم بڵاو کردەوە و رایگەیاند:"ویلایەتە یەکگرتوەکانی ئەمەریکا سەرکۆنەی ئەو ھێرشە درۆنیانەی ئەم دواییە دەکات لە سەرانسەری عیراقدا، بە ھەردوو ھێرشی درۆنی 14 و 15 مانگی تەموزیشەوە  بۆ سەر ژێرخانی گرنگی کێڵگە نەوتیەکانی خۆرمۆڵە و سەرسەنگ لە ھەرێمی کوردستانی عیراقدا".

راشیگەیاندووە:" پێویستە حکومەتی عیراق پیادەی دەسەڵاتی خۆی بکات بۆ ڕێگریکردن لە لایەنە چەکدارەکان بۆ ئەنجامدانی ئەو ھێرشانە بۆسەر ئەو شوێنانە لە ناو خۆی وڵاتدا، بەو شوێنانەشەوە کە کۆمپانیا عیراقی و نێودەوڵەتیەکان وەبەرھێنانیان لە داھاتوی عیراقدا کردووە".

کونسوڵخانەی ئەمریکا لە هەرێمی کوردستان ئاماژەی بەوەشکردووە:" ئەو ھێرشانە قبوڵکراونین و ھەڕەشەن بۆسەر سەروەری عیراق و تەگەرە دەخەنە بەردەم ھەوڵەکانی عیراق بۆ سەرنج ڕاکێشانی وەبەرھێنانی دەرەکی".

لە کۆتایشدا داوای لە حکومەتی عیراق کردووە :" لێکۆڵینەوە بکات تا بزانێت کێ لە پەنای ھێرشەکانەوەیە و ڕووبەڕووی بەرپرسیارێتیان بکاتەوە".

ئەمەش لە کاتێکدایە، شەوی رابردوو و سەرلەبەیانی ئەمڕۆ دوو هێرشی درۆنی کرایە سەر کێڵگە نەوتییەکانی خورمەڵە و ئەتروشی، هەروەها درۆنێکی دیکەش لە نزیک شارۆچکەی تەکیەی پارێزگای سلێمانی کەوتە خوارەوە، هاوکات رۆژی 1ی7ی2025، لە تاسڵوجە دوو درۆن لەلایەن هێزەکانی 70ـەوە لە دووشوێنی جیا خرانە خوارەوە، هەروەها 3ی7ی2025، درۆنێکی بۆمبڕێژکراو لە نزیک فڕۆکەخانەی نێودەوڵەتیی هەولێر خرایە خوارەوەو رۆژی 10ی7ی2025، درۆنێکی دیکە لە نزیک هێزەکانی 70 لە پارێزگای سلێمانی خرایە خوارەوە.


PUKMEDIA