ره‌فعه‌ت عه‌بدوڵڵا: رێكخراوه‌كان بایه‌خێكی گرنگیان بۆ یه‌كێتی هه‌یه‌

نوسینگەی ڕاگەیاندنی جێگری سەرۆکی یەکێتیی نیشتمانیی کوردستان

وێنەیەکى کۆبوونەوەکە

جێگری سەرۆکی یەکێتیی نیشتمانیی کوردستان، لەگەڵ بۆردی رێکخراوەکان و لێپرسراوی ناوەندەکان کۆبوەوە و ئەرکە سەرەکییەکانی ئەمڕۆی خەباتی رێکخراوەیی لەژێر رۆشنایی گۆڕانکارییە بڕیار لێدراوەکاندا رونکردەوە و رایگەیاند، گۆڕانکارییەکان سەنگ و قورسایی دەگەڕێننەوە بۆ سەرجەم ئۆرگانەکان.

لەکۆبونەوەکەدا کە (فریال عەبدوڵا) ئەندامی سەرکردایەتی (ی.ن.ک) ئامادەی بوو، رەفعەت عەبدوڵڵا، کار و چالاکیەکانی سەرجەم ناوەندەکان و رۆڵی هەڤاڵانی لەبۆردی رێکخراوەکان بەباش هەڵسەنگاند و باسی لەبەرنامەی رێکخستنەوەی ئۆرگانە جیاوازەکانی یەکێتی و نوێبونەوەی حزب و گونجان لەگەڵ دۆخی ئەمڕۆدا کرد.

جێگری سەرۆکى یەکێتیى نیشتمانیى کوردستان، ئاماژەی بۆ ئەوەکرد یەکێتی هەمیشە لەگەڵ گۆڕاو و پێدراوە نوێیەکانی سەردەمدا خۆی گونجاندوە و لەوبارەیەوە وتی: "گۆڕانکارییە خێراکان ئاماژەی ئەوەن، دەبێت بەزووترین کات خۆمان کۆبکەینەوە، هەتا لەئایندەی کاری رێکخراوەیی و هەڵمەتی گەشەپێدان و کەمپینی داهاتوو دوانەکەوین".

رەفعەت عەبدوڵڵا باسی لەوەکرد، بۆردی رێکخراوەکان بایەخێکی گرنگی هەیە، بۆ یەکێتی و چۆنیەتی بەستنەوە و قوڵترکردنەوەی خەباتی رێکخراوەیی بەخزمەتی گشتیەوە بۆ زامنکردنی بەردەوامی سەرکەوتنەکانمان ئەرکێکی هەنوکەییە.

PUKMEDIA