فراكسیۆنه‌ كوردستانییه‌كان به‌شداری كۆبوونه‌وه‌ی په‌رله‌مانی عیراق ده‌كه‌ن

ئەرشیف

دانیشتنی ئەنجومەنی نوێنەرانی عیراق

ئه‌مڕ‌ۆ 12ی7ی2025 پشووی وه‌رزی یاسادانانی ئه‌نجومه‌نی نوینه‌رانی عیراق كۆتاییدێت و دانیشتنی ژماره‌ 1 ده‌ستپێده‌كات و له‌كارنامه‌كه‌دا 7 پرۆژه‌یاسا بۆ دانگدان و خوێندنه‌وه‌ ئاماده‌كراوه‌، به‌پێی زانیارییه‌كانی  PUKMEDIA ش فراكسیۆنه‌ كوردستانییه‌كان به‌شداری كۆبوونه‌وه‌كه‌ ده‌كه‌ن.

د.بڕیار ره‌شید ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتی به‌ PUKMEDIA ی راگه‌یاند:" فراكسیۆنی یه‌كێتی به‌شداری كۆبوونه‌وه‌كه‌ی ‌ئه‌مڕۆی ئه‌نجومه‌نی نوێنه‌رانی عیراق ده‌كات، كه‌ بڕیاره‌ ده‌نگ له‌سه‌ر سێ پڕ‌ۆژه‌یاسا بدرێت و خوێندنه‌وه‌ی یه‌كه‌م و دووه‌م بۆ چوار پڕ‌ۆژه‌یاسای دیكه‌ بكرێت".

به‌پێی زانیارییه‌كانی PUKMEDIA ، فراكسیۆنه‌ كوردستانییه‌كانی دیكه‌ش به‌شێك له‌ئه‌ندامانیان له‌به‌غدان بۆ به‌شداری كردن له‌ كۆبوونه‌وه‌كه‌ و هیچ فراكسیۆنێكی كوردستانی بایكۆتی دانیشته‌كانی ئه‌نجومه‌نی نوێنه‌رانی نه‌كردووه‌، كه‌ بڕیاره‌ ئه‌مڕۆ سه‌عات 1ی پاشنیوه‌ڕۆ دانیشتنی ژماره‌ 1 ی دوای پشووه‌كانی ده‌ستپێبكاته‌وه‌.

بڕیاره‌ له‌كۆبوونه‌وه‌كه‌دا خوێندنه‌وه‌و ده‌نگدان له‌سه‌ر ئه‌م پرۆژه‌ یاسایانه‌ بدرێت:

یه‌كه‌م: ده‌نگدان له‌سه‌ر پڕ‌ۆژه‌یاسای (سه‌ندیكای پرۆگرامسازانی عیراق).

 دووه‌م: ده‌نگدان له‌سه‌ر پڕ‌ۆژه‌یاسای (ته‌ندروستیی ده‌روونی).

 سێیه‌م: ده‌نگدان له‌سه‌ر پڕ‌ۆژه‌یاسای (پاراستن له‌ زیانه‌كانی تووتن).

 چواره‌م: خوێندنه‌وه‌ی یه‌كه‌می پڕ‌ۆژه‌یاسای (یه‌كێتی نه‌خۆشخانه‌ تایبه‌ته‌كان له‌ عیراق).

 پێنجه‌م: خوێندنه‌وه‌ی دووه‌م و گفتوگۆكردنی پڕ‌ۆژه‌یاسای هه‌موواركردنه‌وه‌ی یه‌كه‌می یاسای (ده‌سته‌ی نیشتمانی بۆ چاودێریی ناوه‌كی، تیشكه‌وه‌ر، كیمیایی و بایۆلۆجی).

 شه‌شه‌م: خوێندنه‌وه‌ی دووه‌م و گفتوگۆكردنی پڕ‌ۆژه‌یاسای هه‌موواركردنه‌وه‌ی سێیه‌می یاسای (قه‌ره‌بووكردنه‌وه‌ی ئه‌و زیانلێكه‌وتووانه‌ی كه‌ به‌هۆی كرده‌وه‌كانی رژێمی به‌عسه‌وه‌ به‌شێك له‌ جه‌سته‌یان له‌ده‌ستداوه‌).

 حه‌وته‌م: خوێندنه‌وه‌ی دووه‌م و گفتوگۆكردنی پڕ‌ۆژه‌یاسای (چوونه‌پاڵی عیراق بۆ رێككه‌وتننامه‌ی پاراستنی فیزیایی مادده‌ی ئه‌تۆم).

PUKMEDIA