ئەردۆغان: هەموو هەنگاوێک بۆ راگرتنی خوێنڕشتن دەنێین

PUKMEDIA

رەجەب تەیب ئەردۆغان سه‌رۆككۆماری توركیا

دوای چەکدانانی گروپێک لە گەریلاکانی پارتی کرێکارانی کوردستان، سەرۆککۆماری تورکیا رایگەیاند:"پەکەکە بڕیاری لەناوبردنی چەکی جێبەجێکرد، ئەمڕۆ رۆژێکی نوێیە و لاپەرەیەکی نوێ هەڵدەدرێتەوە"، وتیشی:" هەموو هەنگاوێک بۆ راگرتنی خوێنڕشتن دەنێین".

ئەمڕۆ 12ی7ی2025، رەجەب تەیب ئەردۆغان سه‌رۆككۆماری توركیا وتاریکی له‌باره‌ی پڕۆسه‌ی ئاشتی  پێشکەشکرد و رایگه‌یاند:" لە 47 ساڵی رابردووەوە تا ئێستا لە شەڕی پەکەکە 50 هەزار هاووڵاتی لە تورکیا کوژراون، کە نزیکەی 10 هەزاریان سەربازبوون، هەرچەندە چه‌ندین ‌دەسەڵات و حكومه‌ت هاتن، بەڵام نه‌یانتوانی پرسه‌كه‌ چاره‌سه‌ر بكه‌ن".

ئاماژه‌ی به‌وه‌شكرد،" له‌دوای ده‌ستپێشخه‌رییه‌كەی‌ ده‌وڵه‌ت باخچه‌لی سه‌رۆكی مه‌هه‌په‌ قۆناغێكی نوێی ده‌ستیپێكرد و دواتریش په‌یامی ئیمڕاڵی كه‌ داوای كرد چه‌ك دابنرێت و رێكخستنه‌كانی په‌كه‌كه‌ بڕیاری دانانی چه‌كیدا و دوێنێش بڕیاره‌كه‌ی جێبه‌جێكرد".

سەرۆککۆماری تورکیا راشیگەیاند:" لە ئەمڕۆوە گەلی تورکیا بە تورک و کورد و عەرەب و سەرجەم نەتەوە و مەزهەبەکانەوە هاووڵاتی پلە یەکی تورکیان و پێکەوە کاردەکەین بۆ ئاشتی و خۆشگوزەرانی و تەئکید دەکەینەوە ئێمە پێویستمان بە چەک نییە، بەڵکو پێویستمان بە گفتووگۆیە، هەروەها لەم روانگەیەشەوە دڵنیاتان دەکەمەوە کە سنوورە دەستکردەکان دەتوێنەوە".

راشیگەیاند:" لەمێژووماندا لەگەڵ کوردەکان سەرکەوتنی هاوبەشمان هەبووە و لەئەمڕۆوە سەرکەوتنەکان زیاتر دەکەین و بە ئاشتی ئامێز بۆ یەک دەکەینەوە، لەپێناو خاک و وڵاتمان، مێزی گفتووگۆ دەکەینە چارەسەری کێشەکان"

ئەردۆغان ئاماژەی بەوەشکرد،"لەم پرۆسەیەدا بێ جیاوازی هەموومان براوەین، دەتوانین بڵێین گەلی تورکیا براوەیە، بۆیە دەبێت دڵخۆش بین بەم پرۆسەیە، کە لەبەرژەوەندی وڵاتەکەماندایە، لەداهاتووشدا هەنگاوی پێکەوەیی زیاتر بۆ خۆشگوزەرانی گەلەکەمان دەنێین".

 لەبارەی پرۆسەی ئاشتی چەکدانانی گروپێکی پارتی کرێکارانی کوردستان، سەرۆککۆماری تورکیا رایگەیاند:" لەپەرلەمانەوە لیژنەیەک بۆ ئەم دۆخەی ئێستای تورکیا پێکدەهێنین، کە هەوڵەکانی لەپێناو خزمەتی داهاتووی تورکیادا بێت، هەروەها هەمیشە دەرگامان کراوە دەبێت بۆ هەر نەتەوە و لایەنێک کە بیەوێت بە گفتووگۆ چارەسەری کێشەکانی بکات، ئەوەی گرنگە دەبێت ئاماژەی پێبدەم ئەوەیە لەئەمڕۆوە دایکانمان جەرگ سووتاو نابن و هەمووان پێکەوە لەسەر خاکی تورکیا دەژین، هەروەها سوپاسی هەموو ئەو لایەنانە دەکەم کە پشتیوانمان بوون بۆ سەرخستنی پرۆسەی ئاشتی لەتورکیا، بەتایبەت حکومەتی فیدراڵی عیراق و حکومەتی هەرێم".

PUKMEDIA