دادگای فیدراڵی بۆ پرسی مووچەی هەرێم کۆدەبێتەوە

ئەرشیف

بینای دادگای فیدراڵی عیراق

بڕیارە رۆژی دووشەممەی داهاتوو دادگای فیدراڵی لەبارەی دوو سکاڵا دژی وەزیری دارایی عیراق و نەناردنی مووچەی مووچەخۆرانی هەرێم کۆببێتەوە.

رۆژی دووشەممەی داهاتوو 14ی7ی2025 دادگای فیدڕاڵی عیراق لەبارەی سکاڵایەک تایبەت بە دەرکردنی بڕیارێکی سالاری بۆ پابەندکردنی وەزارەتی دارایی عیراق بە خەرجکردنی مووچەی موچەخۆرانی هەرێم و دوورخستنەوەی پرسی مووچە لە ناکۆکییەکان کۆببێتەوە.

بەپێی زانیارییەکانی PUKMEDIA سکاڵای یەکەم لەسەر سەرۆکوەزیرانی عیراق و وەزیری دارایی عیراق تۆمارکراوە و تێیدا داواکراوە خەرجکردنی مووچەی مووچەخۆرانی هەرێم مانگانە و لەوادەی خۆیدا گەرەنتی بکرێت و پرسی مووچە دووربخرێتەوە لە هەر ململانێ و ناکۆکییەکی سیاسی.

هەروەها لە سکاڵای دووەمدا کە لەسەر وەزیری دارایی عیراق تۆمارکراوە، داواکراوە بڕیارێکی سالاری دەربکرێت بۆ خەرجکردنی مووچە و لەم مانگەوە بڕیارەکە جێبەجێ بکرێت و چیتر گرفت بۆ خەرجکردنی مووچە دروست نەکرێت، هاوکات ئەگەر پێش دانیشتنی دادگاکە هەرێم و بەغدا رێبکەون، ئەوا داگاکە فەرمانسالاری بۆ خەرجکردنی مووچە دەردەکات.

ئەمەش لە كاتێكدایە، بڕیاربوو رۆژی 19ی6ی2025، دادگای باڵای فیدراڵی عیراق بۆ بڕیاردان لەسەر سكاڵای ژمارەیەك فەرمانبەر، لەبارەی راگرتنی مووچەی مووچەخۆرانی هەرێم كۆببێتەوە، بەڵام كۆبوونەوەكە بۆ كاتێكی نادیار دواخرا و هەمان رۆژ، شەش دادوەری سەرەكی دادگای فیدراڵی و سێ دادوەری یەدەگ دەستلەكاركێشانەوەیان پێشكەش كرد، بەپێی زانیارییەكانی PUKMEDIA كە لە یەكێك لەدادوەرەكانی دادگاكە وەریگرتبوو، هۆكاری دەستلەكاركێشانەوەی ئەو دادوەرانە بۆ ئەوە دەگەڕێتەوە كە سەرۆكی دادگاكە بۆ بڕیاردان و كۆبوونەوەكان ناگەڕێتەوە بۆ دادوەرەكان و بڕیاری تاك لایەنە دەدات.

PUKMEDIA