ئه‌نجومه‌نی وه‌زیران بڕیاری له‌ناردنی مووچه‌ بۆ هه‌رێم نه‌دا

نوسینگەی راگەیاندنی سەرۆكوەزیرانی عیراق

كۆبوونەوەی ئەنجومەنی وەزیرانی عیراق

كۆبوونەوەی ئەنجومەنی وەزیرانی عیراق كۆتایی هات و بڕیار لەبارەی مووچەوە نەدرا، لەبەرامبەردا ئەنجومەنەكە لیژنەیەكی لە پێنج وەزیر بۆ یەكلایی كردنەوەی پڕۆژە پێشنیازكراوەكەی حكومەتی عیراق و هەرێم لەبارەی چارەسەری مووچە و نەوت و داهات و تەوتین، پێكهێنا".

كاروان یاروەیس، ئەندامی ئەنجومەنی نوێنەران لە فراكسیۆنی یەكێتی، بە وێبسایتی رەسمی یەكێتیی نیشتمانیی كوردستان  PUKMEDIA  ی راگەیاند: "كۆبوونەوەكەی ئەمڕۆی ئەنجومەنی وەزیرانی عیراق كۆتایی هات و بڕیاری لەبارەی مووچەوە نەدا، ئەنجومەنەكە لیژنەیەكی لە وەزیرانی داد، تەندروستی، دارایی، پلاندانان، خوێندنی باڵا بۆ تاوتوێ كردن و یەكلایی كردنەوەی هەردوو پڕۆژە پێشنیازكراوەكەی حكومەتی عیراق و حكومەتی هەرێم لەبارەی چارەسەری مووچە و نەوت و داهات و تەوتین، پێكهێنا".

"لیژنەكە پڕۆژەیەك لە هەردوو پڕۆژەكەی هەرێم و ئیتحادی گەڵاڵە دەكەن و دەیخەنە بەردەم ئەنجومەنی وەزیرانی عیراق" كاروان یاروەیس وادەڵێت.

ئەمەش لە كاتێكدایە، هەر ئەمڕۆ، رۆژنامەی سەباحی عیراق رایگەیاند: "لە ماوەی 48 سەعاتی رابردوودا هەوڵێكی زۆر دراوە تاوەكو كێشەكانی نێوان عیراق و هەرێم چارەسەربكرێن، لەسەروی هەموویانەوە كێشەی مووچە و هەناردەكردنەوەی نەوت و لە ئێستادا هەردوو حكومەت، لەسەر چەند خاڵێك رێككەوتوون و چاوەڕاندەكرێت لە كۆبوونەوەی ئەمڕۆی ئەنجومەنی وەزیراندا باس لە رێككەوتنەكە بكرێت و بەڕەسمی رێككەوتنەكە ئیمزا بكرێت"، بەڵام كۆبوونەوەكە كۆتایی هات و هیچ بڕیارێك لەبارەی ناردنی مووچەی مووچەخۆرانی هەرێمەوە نەدرا.

PUKMEDIA