هێزەکانی 70 : دژایەتی توانا و پێشکەوتنەکانمان دەکرێت

راگەیاندنى هێزەکانى 70

لۆگۆى هێزەکانى 70

راگه‌یاندنی فه‌رمانده‌یی هێزه‌كانی 70 روونکردنەوەیەکى سەبارەت بە هاککردنى پەڕەى رەسمى هێزه‌كانی 70 له‌ تۆڕی كۆمه‌ڵاتی فه‌یسبوك بڵاوکردەوە و رایگەیاند : "ده‌ستێكی ره‌ش و دژ و  ناحه‌ز به نیشتیمان و ‌هێزی پێشمه‌رگه،‌ كه‌ گومان ده‌كرێت نه‌یاری ناوخۆی  یه‌كێتیی نیشتیمانیی کوردستان بێت، هه‌ستان به هاككردن و‌ دزه‌كردنه‌ ناو په‌ڕه‌ی ره‌سمی هێزه‌كانی 70 له‌ تۆڕی كۆمه‌ڵاتی فه‌یسبوك و ده‌ست به‌سه‌رداگرتنی، به‌ ئامانجی دژایه‌تكردن و شاردنه‌وه‌ی  ئه‌و پێشكه‌وتنه‌ به‌رچاوه‌ی هێزه‌كانی 70ی پێشمه‌رگه‌ له‌ماوه‌ی رابردوودا به‌ده‌ستی هێناوه‌".

ئەمەش دەقى روونکردنەوەکەیە:

به‌داخه‌وه‌ له‌ماوه‌ی چه‌ند هه‌فته‌ی رابردوودا، ده‌ستێكی ره‌ش و دژ و  ناحه‌ز به نیشتیمان و ‌هێزی پێشمه‌رگه،‌ كه‌ گومان ده‌كرێت نه‌یاری ناوخۆی  یه‌كێتی نیشتیمانی بێت، هه‌ستان به هاككردن و‌ دزه‌كردنه‌ ناو په‌ڕه‌ی ره‌سمی هێزه‌كانی 70 له‌ تۆڕی كۆمه‌ڵاتی فه‌یسبوك و ده‌ست به‌سه‌رداگرتنی،  به‌ ئامانجی دژایه‌تكردن و شاردنه‌وه‌ی  ئه‌و پێشكه‌وتنه‌ به‌رچاوه‌ی هێزه‌كانی 70ی پێشمه‌رگه‌ له‌ماوه‌ی رابردوودا به‌ده‌ستی هێناوه‌، چی له‌رووی مه‌شق و راهێنان و توانای سه‌ربازی و چاكسازی و خۆڕێكخستنه‌وه‌، چی له‌رووی فراوان بوونی هاوكاری و په‌یوه‌ندییه‌كان به‌تایبه‌ت له‌گه‌ڵ هاوپه‌یمانان.

به‌ڵام خۆشبه‌ختانه،‌ توانرا له‌ ماوه‌یه‌كی كه‌مدا و به‌هه‌وڵ و هیمه‌تی دڵسۆزانه‌ و پێشمه‌رگه‌ ئاسایانه‌ی هاوڕێ و هاوكارانمان دووباره‌ په‌یجه‌كه‌ به‌ده‌ست بهێنینه‌وه‌، ئێستا په‌یجه‌كه‌ به‌ته‌واوی له‌ژێر كۆنترۆڵدایه‌، له‌هه‌مان كاتدا رێكاری یاسایی و پێویستیش ده‌گێرێته‌به‌ر بۆ لێپێچینه‌وه‌ له‌و كار و تاوانه‌.

هێزی پێشمه‌رگه‌ی كوردستان، سمبوڵ و هێمای به‌رخۆدان و تێكۆشان  و ئازادی و سه‌ربه‌ستی خه‌ڵكی كوردستانه‌و پارێزه‌ری خاكی پیرۆزی كوردستانه ‌و  خاوه‌نی هه‌زاران داستان و قوربانی و شه‌هیدی سه‌ربه‌رزه‌، ئه‌م پێگه‌یه‌ش دوور له‌هه‌ر ئامانجێكی سیاسی له‌هه‌وڵی خزمه‌تكردنی ئه‌م هێزه‌ دڵسۆز و تێكۆشه‌ره ‌و كۆڵنه‌ده‌ره‌یه‌ بۆیه‌ خۆی له‌ خۆیدا ده‌ست بردن بۆ ئه‌م كاره‌ گه‌وره‌ترین تاوان و هه‌ڵه‌ كه‌ كراوه‌ و قابیلی لێ خۆش بوون نییه‌.

‌روونیشی ده‌كه‌ینه‌وه،‌ لێره‌ به‌دواوه‌ په‌یجه‌كه‌مان دووباره‌ به‌ هێزو گۆڕێكی تر و به‌ ته‌كنیكی باشتر و پێشكه‌وتووتر به‌رده‌وام ده‌بێت له‌ بڵاوكردنه‌وه‌ی بابه‌ته‌كانی بۆ خزمه‌تكردنی هێزی پێشمه‌رگه‌ی كوردستان و خستنه‌رووی ئه‌و پێشكه‌وتن و ده‌ستكه‌وتانه‌ی  هێزه‌كانی 70 رۆژ به‌رۆژ به‌ده‌ستی ده‌هێنێت و پێی ده‌گات.

سوپاس بۆ هه‌موو ئه‌و پێشمه‌رگه‌و كه‌س و لایه‌ن و هاووڵاتیانه‌ی نیگه‌ران بوون به‌و رووداوه‌، سوپاس و ده‌ستخۆشی گه‌رممان  هه‌یه‌ بۆ هه‌ركه‌سێك كه‌  پشتیوانی و پشگیری له‌چالاكییه‌كانمان ده‌كات  بۆ گه‌یاندنی  ده‌نگ و ره‌نگی پێشمه‌رگه‌ به‌ هه‌موو لایه‌ك .

راگه‌یاندنی فه‌رمانده‌یی هێزه‌كانی 70

4ی ته‌مووزی 2025

PUKMEDIA