ترەمپ: ئاگربەستی غەززە نزیکە

میدیاکان

دۆناڵد ترەمپ سەرۆکی ئەمریکا

دۆناڵد ترەمپ  سەرۆکی ئەمریکا  ئاشکرایدەکات، ئیسرائیل  بە ئاگربەست لە کەرتی غەززە بۆ ماوەی 60 رۆژ رازیبوە و دەڵێت:"ئەگەر حەماس رازی نەبێت، دۆخی ناوچەكە خراپتر دەبێت".

دۆناڵد ترەمپ لە ئەکاونتى تایبەتی خۆی لە پلاتفۆڕمی "Truth Social" باسی کۆبوونەوەی دوێنێی1ى7ی2025 لەگەڵ بەرپرسانی ئیسرائیل دەکات، سەبارەت بە ئاگربەست لە غەززە و بە کۆبوونەوەیەکی "بەرهەمدار" وەسفی دەکات . 

 سەرۆکی ئەمریکا دەڵێت:"ئیسرائیل لەسەر مەرجەکانی ئاگربەست بۆ ماوەی 60 رۆژ لە کەرتی غەززە رەزامەندە و  لەو ماوەیەدا لایەنەکان کار بۆ کۆتاییهێنان بە شەڕ دەکەن".

 بەپێی ئەو زانیارییانەی سەرۆکی ئەمریکا بڵاویکردووەتەوە، قەتەر و میسر رۆڵیان هەبووە و دەڵێت:"قەتەر و میسر بۆ گەیشتن بە ئاشتی زۆر ماندوبون و هیواخوازە :"لە پێناو رۆژهەڵاتی ناوەڕاستدا، حەماس ئەو رێککەوتنە قبوڵ بکات، بەپێچەوانەوە دۆخەکە باشتر نابێت، بەڵکو خراپتر دەبێت".

پێشتر ترەمپ  رایگەیاندبو کە ئەمریکا هەوڵدەدات، "لە ماوەی هەفتەی داهاتودا" بە ئاگربەست لە نێوان ئیسرائیل و حەماس لە کەرتی غەززە بگات.

جەنگەکەى نێوان ئیسرائیل و غەززە بە هێرشی حەماس لە 7ـی ئۆکتۆبەری 2023 دەستیپێکرد،کە 1200 ئیسرائیلی کوشتن و زیاتر لە 250 کەسی بە بارمتە گرت، ئیسرائیل-یش لە ئۆکتۆبەری 2023 هێرشەکەی بۆ سەر غەززە دەستپێکرد و بەگوێرەی دواین ئامارى وەزارەتی تەندروستیی غەززە، هێرشە سەربازییەکانی ئیسرائیل  بوونەتە هۆی کوژرانی زیاتر لە 56  هەزار  کەس، کە  زۆرینەیان سڤیلن.

PUKMEDIA