سەرۆكی دادگای فیدراڵی خانەنشینكرا

میدیاکان

دادگای باڵای فیدراڵی عیراق

ئەنجومەنی باڵای دادوەری عیراق، رەزامەندی لەسەر خانەنشینكردنی دادوەر جاسم محەمەد عەبود سەرۆكی ئێستای دادگای فیدراڵی دەربڕی و دادوەر مونزیر ئیبراهیم حسێن، جێگری سەرۆكی دادگای پێداچوونەوەی بۆ ئەو پۆستە كاندید كرد.

ئەنجومەنی باڵای دادوەری عیراق رایگەیاند: "ئەمڕۆ 29ی 6ی 2025، لیژنەی ماددەی 3ی یاسای دادگای باڵای فیدراڵی ژمارە 30 ی ساڵی 2005 ی هەمواركراو كۆبوەوە و رەزامەندی لەسەر خانەنشینكردنی دادوەر جاسم محەمەد عەبود سەرۆكی ئێستای دادگای فیدراڵی، بەهۆی چەند گرفتێكی تەندروستییەوە دەربڕی".

راشیگەیاند: "ئەنجومەنی باڵای دادوەری عیراق، دادوەر مونزیر ئیبراهیم حسێن، جێگری سەرۆكی دادگای پێداچوونەوەی بۆ سەرۆكی دادگای باڵای فیدراڵی عیراق كاندید كرد".

ئەنجومەنی باڵای دادوەری عیراق راشیگەیاندووە: "نووسراو بۆ سەرۆكایەتی كۆماری عیراق نێردراوە، بۆ ئەوەی  مەرسومی كۆماریی بۆ دانانی دادوەر مونزیر ئیبراهیم حسێن، بە سەرۆكی دادگای باڵای فیدراڵی عیراق دەربكات".

داوەر مونزیر ئیبراهیم حسێن، لەدایكبووی ساڵی 1963 یە و ساڵی 1989 كۆلێژی یاسای لە زانكۆی بەغدا تەواو كردووە،  ساڵی 1998 پەیمانگای دادوەری تەواوكردووە و لە ساڵی 2018 وە تا ئێستا لە دادگای پێداچوونەوەی فیدراڵی كاردەكات و ئەندامی یەدەگی دادگای باڵای فیدراڵی عیراقیشە.

ئەمەش لە كاتێكدایە، بڕیاربوو رۆژی 19ی6ی2025، دادگای باڵای فیدراڵی عیراق بۆ بڕیاردان لەسەر سكاڵای ژمارەیەك فەرمانبەر، لەبارەی راگرتنی مووچەی مووچەخۆرانی هەرێم كۆببێتەوە، بەڵام كۆبوونەوەكە بۆ كاتێكی نادیار دواخرا و هەمان رۆژ، شەش دادوەری سەرەكی دادگای فیدراڵی و سێ دادوەری یەدەگ دەستلەكاركێشانەوەیان پێشكەش كرد، بەپێی زانیارییەكانی PUKMEDIA كە لە یەكێك لەدادوەرەكانی دادگاكە وەریگرتبوو، هۆكاری دەستلەكاركێشانەوەی ئەو دادوەرانە بۆ ئەوە دەگەڕێتەوە كە سەرۆكی دادگاكە بۆ بڕیاردان و كۆبوونەوەكان ناگەڕێتەوە بۆ دادوەرەكان و بڕیاری تاك لایەنە دەدات.

PUKMEDIA