كۆمسیۆن وردبینی لە لیستی ناوی كاندیدان دەكات

PUKMEDIA

جومانە غەلای وتەبێژی كۆمسیۆن

كۆمسیۆنی باڵای سەربەخۆی هەڵبژاردنەكانی عیراق رایگەیاند: "وردبینی لە لیستی ناوی كاندیدان بۆ هەڵبژاردنی ئەنجومەنی نوێنەرانی عیراق دەستیپێكردووە"، وتەبێژی كۆمسیۆنەكەش دەڵێت: "ژمارەی ناوی كاندیدان زۆرن و پڕۆسەكەش كاتی دەوێت".

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق لە لێدوانێكی رۆژنامەوانیدا رایگەیاند: "پاش ئەوەی دوێنێ 26ی 6ی 2025، وادەی تۆماركردنی ناوی كاندیدان بۆ هەڵبژاردنی ئەنجومەنی نوێنەرانی عیراق تەواو بوو، كۆمسیۆن دەستی بە وردبینیكردن لە ناوی ئەو كاندیدانەدا كردووە كە بۆ بەشداریكردن لە هەڵبژاردنەكەدا پێشكەش كراون".

راشیگەیاند: "پڕۆسەی وردبینی لە ناوی كاندیدان پڕۆسەیەكی گرنگە و پێویستی بە كاتێكی زۆرە، چونكە ژمارەی ناوی ئەو كاندیدانەی پێشكەشی كۆمسیۆن كراون زۆرن".

یەكێتیی نیشتمانیی كوردستان بۆ بەشداریكردن لە هەڵبژاردنی ئەنجومەنی نوێنەرانی عیراق، ناوی سەرۆكی لیست و كاندیدەكانی پێشكەش بە كۆمسیۆنی باڵای سەربەخۆی هەڵبژاردنەكانی عیراق كردووە و نزیكەی 200 كاندیدی لەسەر ئاستی پارێزگاكانی هەولێر، سلێمانی، دهۆك، كەركوك، نەینەوا، دیالە، سەلاحەدین و بەغدا هەیە.

ئەمەش لە كاتێكدایە، ئەنجومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد.

PUKMEDIA