زیانه ‌گیانییه‌كانی جه‌نگی ئێران و ئیسرائیل زیاتر له‌ 4 هه‌زار كه‌سه‌

Insurance Insider

جەنگی نێوان ئیسرائیل و ئێران

جه‌نگی ئێران و ئیسرائیل 4 هه‌زار و 171 كوژراو برینداری لێكه‌وتووه‌ته‌وه،‌ كه‌ زۆرترین زیانه‌ گیانییه‌كان به‌ر ئێران كه‌وتووه‌.

ئه‌مڕۆ شه‌ممه‌ 21ی6ی2025، وه‌زاره‌تی ته‌ندروستی ئێران بڵاویکردووەتەوە:" له‌ سه‌ره‌تای هێرشه‌كانی ئیسرائیل بۆ سه‌ر ئێران 430 كه‌س كوژراون و 3 هەزار و 500 كه‌سیش برینداربوون، کە به‌شێك له‌كوژراو برینداره‌كان سەر بە تیمه‌كانی ته‌ندروستی و فریاكه‌وتنن و به‌شێكی زۆریشیان هاووڵاتی ئاسایین".

لەبەرامبەردا ته‌ندروستی ئیسرائیل رایگه‌یاندووه‌:" له‌ سه‌ره‌تای هێرشه‌كانی ئێران بۆ سه‌ر وڵاته‌كه‌مان تا ئه‌مڕۆ 21ی6ی2025 ، 24 كه‌س كوژراون و 271 كه‌سیش برینداربوون".

بڵاوکردنەوەی ئەم ئامارانە لەکاتێکدایە، جه‌نگی ئێران و ئیسرائیل پێی نایه‌ نۆهه‌مین رۆژییه‌وه ‌و شه‌وی رابردووش هه‌ردوو وڵات‌ به‌موشه‌ك دووباره‌ هێرشیان كرده‌وه‌ سه‌ر یه‌كتر و ژماره‌یه‌ك هاووڵاتی له‌هه‌ردوولا به‌هۆی ئه‌و بۆردومانه‌وه‌ برینداربوون، هاوکات له‌سه‌ر ئاستی نێوده‌وڵه‌تی هه‌وڵه‌كان به‌رده‌وامن بۆ راگرتنی ئه‌و جه‌نگه‌، به‌ڵام دوێنێ هه‌ینی دۆناڵد تره‌مپ سه‌رۆكی ئه‌مریكا له‌كۆنگره‌یه‌كی رۆژنامه‌وانیدا رایگه‌یاند:"جارێ ناتوانم له‌باره‌ی ئێرانه‌وه‌ بڕ‌یاری كۆتایی بده‌م، ره‌نگه‌ پشتیوانی له‌ئاگربه‌ستی نێوان ئیسرائیل و ئێران بكه‌م و ئاسان نییه‌ هیچ لایه‌كی جه‌نگه‌كه‌ رازی بكه‌ین ئه‌م شه‌ڕ‌ه‌ بوه‌ستێنن."

PUKMEDIA