پزیشکیان: هەوڵی بەدەستهێنانی چەکی ئەتۆمی نادەین

FP

دیمەنی ئێران

سەرۆک کۆماری ئێران رایدەگەیەنێت:"ئیسرائیل ناتوانێت ئێران شکست پێبهێنێت"، دەشڵێت:" بەپشتبەستن بە سیاسەتەکانی رێبەری شۆڕشی ئیسلامی هەوڵی هەڵگرتنی چەکی ئەتۆمی نادەین و ئەمەش باوەڕێکی پتەومانە".

 مەسعود پزیشکیان سەرۆککۆماری ئێران، لە میانی بەشداریکردنی لە پەرلەمانی وڵاتەکە،رایگەیاند:" ئێران وڵاتێکی دەستدرێژیکار نییە، بۆیە لەهەموو کاتێک زیاتر پێویستمان بە یەکڕیزی ناوخۆیی هەیە بۆ  وەستانەوە بەرامبەر دەستدرێژیی".

ئاماژەی بەوەشکرد: "ئیسرائیل ناتوانێت لەڕێگەی کوشتن و تیرۆرەوە شکستمان پێبهێنێت و هێزەکانمان بەرامبەر ئەم ترسنۆکانە دەوەستنەوە، بەپشتبەستن بە سیاسەتەکانی رێبەری شۆڕشی ئیسلامی هەوڵی بەدەستهێنانی چەکی ئەتۆمی نادەین و ئەمەش باوەڕێکی پتەومانە".

 پزیشکیان راشیگەیاند: "ئێمە نەبووین وازمان لە دانوستانەکان هێنا و ئەوەی داوای دەکەین مافی یاسایی خۆمانە، هیچ کەس ناتوانێت مافی سوودمەندبوونمان لە وزەی ئەتۆمی لەپێناو بەرژەوەندی گەلەکەمان لێبستێنێتەوە".

وتیشی:"ئەمریکا بە ڕێگەدان بە ئیسرائیل بۆهێرشکردنە سەرمان، پراکتیزەی قسەی ناشرین و پێشێلکردنی یاسا نێودەوڵەتییەکان دەکات، بەڵام ئێمە خۆڕاگرین و لە هیچ ناترسین، داواش لە گەلەکەمان دەکەین لەم قەیرانانەدا سەبر بگرن".


PUKMEDIA