ترەمپ: کارمەندەکانمان لە رۆژهەڵاتی ناوەڕاست دەکشێنینەوە

AFP

دۆناڵد ترەمپ سەرۆکی ئەمریکا

سەرۆکی ئەمریکا رایدەگەیەنێت: ئیدارەکەی دەست بە کشانەوەی کارمەندانی وڵاتەکەی لە رۆژهەڵاتی ناوەراست دەکات،وەزارەتی دەرەوەی ئەو وڵاتەش داوا لە هاووڵاتییەکانی دەکات:" گەشت بۆ عیراق نەکەن".

دۆناڵد ترەمپ سەرۆکی ئەمریکا، لە میانی بەشداریکردنی لە ئاهەنگێکی میوزیک لە سەنتەری کیندی لە واشنتن، رایگەیاند:" کارمەندەکانمان لەرۆژهەڵاتی ناوەڕاست دەکشێنینەوە، چونکە پێدەچێت شوێنێکی مەترسیدار بێت".

ئەم لێدوانەی ترەمپ دوای ئەوە دێت، کە بەرپرسانی ئەمریکا ئاماژەیان بەوە کردبوو بەشێک لە کارمەندانی وڵاتەکەیان لە باڵیۆزخانەی ئەمریکا لە بەغدا دەکشێننەوە.

لەلایەکی دیکەوە، وەزارەتی دەرەوەی ئەمریکا ئاستی هۆشداریی گەشتکردنی بۆ عیراق دەرکرد و داوای لە هاووڵاتییەکانی کرد گەشت بۆ ئەو وڵاتە نەکەن.

وەزارەتی دەرەوەی ئەمریکا لە راگەیەندراوەکەیدا ئاماژەی بەوەشکردووە: "بەهۆی نائارامیی و توانای سنوورداری حکومەتی ئەمریکا بۆ پێشکەشکردنی خزمەتگوزاریی فریاگوزاری بە هاووڵاتییان،داوا دەکەین هاووڵاتیانمان گەشت بۆ عیراق نەکەن."

PUKMEDIA