گەورەترین پارکى نموونەیى لە کەرکوک دروستدەکرێت

کوردستانى نوێ

پارێزگارى کەرکوک لە کاتى دانانى بەردى بناغەکە

دوێنێ لە رێوڕەسمێكدا، پارێزگاری كەركوك، بەردی بناغەی دروستكردنی گەورەترین پاركی نموونەیی بە رووبەری 100 دۆنم زەوی لە دەروازەی كەركوك-سلێمانی دانا، بەڕێوەبەری شارەوانیش رایدەگەیەنێت: " پرۆژەکە بڕی هەشت ملیار و 500 ملیۆن دیناری بۆ تەرخانكراوە و دەبێت لە ماوەی 300 رۆژدا، تەواوبكرێت".

ئەندازیار ئەحمەد عومەر بەڕێوەبەری شارەوانیی كەركوك، رایگەیاند: "ئیدارەی خۆجێیی ئێستای كەركوك بایەخ و گرنگییەكی زۆر بە ژینگە و زیادكردنی پانتایی سەوزایی و جوانكردنی سیمای شار دەدات، كە جێبەجێكردنی ئەو پاركەش لەو چوارچێوەیەدایە".

ئاماژەی بەوەشكرد: "كە درەختەكانی پاركەكە لە جۆری ئەلبیزیا، ئەكاسیا و سەروی هەرەمی-ن، بەشێوەیەكی گشت-یش پاركەكە رووبەرێكی زۆری سەوزاییە و شوێنی پشوودان، یاریی منداڵان، پاركی ئۆتۆمبێلی تێدایە و بەشێوەیەكی پێشكەوتووش سیستمی ئاودێرییەكەی بۆ دادەنرێت و ئاوی پێویستیشی بۆ رادەكێشرێت و لەگەڵ تەواوبوونی پرۆژەكەشدا ستافی پێویستی بۆ دادەنرێت".

باسی لەوەشكرد: "ئەوەی جێگەی دەستخۆشییە ئەوەیە ئیدارەی ئێستای كەركوك لەگەڵ دروستكردنی هەر پڕۆژەیەكی سەوزایی، لایەنە پەیوەندیدارەكان رادەسپێرێت كە خزمەتی پڕۆژەكە بكەن و هەر لایەنێكیش كەمتەرخەم بێت، تووشی لێپرسینەوە دەبێت".

PUKMEDIA \ کوردستانى نوێ