سایلۆی سلێمانی: دەست بەپڕۆسەی کڕینی گەنمی جوتیاران دەکرێت

میدیاکان

سایلۆى گەنم

سبەی دەست بەکڕینی گەنمی جوتیاران بۆ وەرزی ئەمساڵ دەکرێت و بەڕێوەبەرایەتی بازرگانی دانەوێڵەی سلێمانی ئاشکرای دەکات، کە سبەی سێشەمە تەنها جوتیارانی سنوری هەردوو بەشی کشتوکاڵی پیرەمەگرون و تانجەرۆ(عەربەت) دەتوانن گەنمەکانیان بهێنن.

بەڕێوەبەرایەتی بازرگانی دانەوێڵەی سلێمانی لە راگەیەندراوێکدا دەڵێت:" ئەمساڵیش وەک ساڵی رابردوو پڕۆسەی کڕینی گەنم ناوچە بە ناوچە ئەنجام دەدرێت".

بەپێی راگەیەندراوەکە، سبەی تەنها جوتیارانی سنوری هەردوو بەشی کشتوکاڵی پیرەمەگرون و تانجەرۆ(عەربەت) دەتوانن گەنمەکانیان بهێنن،  جوتیارانی بەشە کشتوکاڵیەکانی دیکە رێگایان پێ نادرێت.

لە راگەیەندراوەکەدا چەند مەرجێکی دیکە خراوەتەڕوو، بۆ وەرگرتنی گەنم کە دەبێت ئوتومبێلە بارهەڵگرەکان  بە یەکڕیز رابگیرێن و تەواو پڕ بن لە دانەوێڵە و هەروەها  تراکتۆرەکانیش لای دیواری سایلۆوە بۆ سەرەوە بۆ لای سەربڕخانەکەی پیرەمەگرون بە یەکڕیز بوەستن.

هەر لە راگەیەندراوەکەدا هاتووە، کە بۆ هەر بارهەڵگرێک بۆ رایی کردنی مامەڵەکان تەنها شوفێرەکە بچێتە ژوورەوە و  ئەگەر بەرزی بۆدی بارهەڵگرەکان بەشێوەیەک بەرز کرابێتەوە کە ئامێری راکێشان نەگاتە بنی بۆدیەکە، گەنمەکەی لێ وەرناگیرێت.

بەپێی مەرجەکان جوتیاران گەنمەکانیان تەنها لەو بارهەڵگرانە باردەکەن کە خۆیان هەڵی دەڕێژن.

PUKMEDIA