قوباد تاڵەبانی بۆ پەروین بوڵدان: دڵنیام لە پڕۆسەی ئاشتیدا رۆڵی گرنگتر دەبینيت

PUKMEDIA

قوباد تاڵەبانی و پەروین بوڵدان و سری سورەیا ئوندەر

قوباد تاڵەبانی جێگری سەرۆكی ئەنجومەنی وەزیرانی هەرێمی كوردستان، پیرۆزبایی لە پەروین بوڵدان دەكات، بەبۆنەی دەستنیشانكردنی بە جێگری سەرۆكی پەرلەمانی توركیا و رایگەیاند: "دڵنیام لەم ئەركە نوێیەدا رۆڵی گرنگتر دەبینن لە سەرخستنی پڕۆسەی ئاشتی و دابینكردنی مافەكانی گەلی كورد لە توركیا".

دوابەدوای كۆچی دوایی سری سورەیا ئۆندەر، جێگری سەرۆكی پەرلەمانی توركیا، لە 3ی ئایاری 2025، پارتی یەكسانی و دیموكراتی گەلان، پەروین بوڵدان، پەرلەمانتاری وان-ی وەك جێگری نوێی سەرۆكی پەرلەمانی توركیا هەڵبژارد، بەو بۆنەیەوە قوباد تاڵەبانی جێگری سەرۆكی ئەنجومەنی وەزیرانی هەرێمی كوردستان، پەیامێكی پیرۆزبایی ئاڕاستەی پەروین بوڵدان دەكات كە ئەمە دەقەكەیەتی:

دەقی پەیامەكە:

بەڕێز خاتوو پەروین بوڵدان، جێگری سەرۆكی پەرلەمانی توركیا

بەبۆنەی دەستنیشانكردنتان بە جێگری سەرۆكی پەرلەمانی توركیا پیرۆزباییتان لێ دەكەم. 
بەگرنگییەوە دەڕوانینە هەوڵەكانتان وەك كەسایەتییەكی تێكۆشەری سیاسی و پەرلەمانی كە بەردەوام هەوڵی باشتر چەسپاندنی بنەماكانی دیموكراسی و برایەتی و پێكەوەژیان و رەخساندنی ئاشتی و دادپەروەری دەدەن. 

هیوای سەركەوتنتان بۆ دەخوازم و دڵنیام لەم ئەركە نوێیەدا رۆڵی گرنگتر دەبینن لە سەرخستنی پرۆسەی ئاشتی و دابینكردنی مافەكانی گەلی كورد لە توركیا.

PUKMEDIA